Resei federaldy qaýipsizdik qyzmeti (FSB) Máskeýdegi sinagogaǵa josparlanǵan lańkestik shabýyldyń aldyn alǵanyn málimdedi. Vedomstvo buny "Orta Aziia elderiniń birinen kelgen" adam jasamaq bolǵanyn jetkizdi, dep habarlaidy Dalanews.kz.
“Resei Federatsiiasynyń federaldy qaýipsizdik qyzmeti Máskeýdegi evrei dini mekemesinde azamattardyń jappai jinalýy kezinde terakt jasaýdy josparlaǵan Orta Aziia azamatynyń qylmystyq áreketiniń jolyn kesti”, - delingen habarlamada.
Bul jóninde Reseidiń arnaiy qyzmetine súiengen "Interfaks" agenttigi málimdedi.
Oqiǵanyń qai kúni bolǵany jáne kúdiktiniń aty-jóni de belgisiz. FSB-nyń aitýynsha,kúdikti turǵan orynnan tintý kezinde jarylǵysh zattar tabylǵan.
"Óz elinde qylmys jasap, qamalǵan ol jazasyn ótegen kezde terrorizm boiynsha sottalǵan adamdarmen bailanys ornatyp, solardyń yqpalymen Resei Federatsiiasynda tyiym salynǵan halyqaralyq terroristik uiymnyń ideologiiasyn tarata bastaǵan" dep jazylǵan vedomstvo habarlamasynda.
Aitýlarynsha, 2023 jyldyń qarashasynda koloniiadan shyqqan soń er adam Reseige kelgen.
“Máskeýde turyp jatqan sheteldikter lańkestik áreket jasaýǵa daiyndalǵan: ol astanadaǵy sinagogalardyń birinde “qorshalǵan aýmaqqa barlaý júrgizgen”, sondai-aq qoldan jasalǵan jarylǵysh qurylǵyny jasaýǵa arnalǵan bólshekter satyp alǵan”, - dep habarlady.
FSB buǵan qosa, Donetskidegi áskeri nysanda terakt uiymdastyrmaq boldy dep kúdikke ilingen Orta Aziianyń alty azamaty ustalǵanyn habarlady. Bul jóninde Astra telegram-arnasy habarlady.
Buǵan deiin Resei FSB-sy Kalýga oblysynda Qazaqstannyń eki azamaty Sábit Áshiráliev pen Jánibek Tasqulovty óltirgeni belgili bolǵan.
FSB-nyń sózinshe, olar "Máskeýdegi sinagogalardyń birine qarýly shabýyl jasaýdy josparlaǵan".
Eske salaiyq, jaqynda Krokýs Siti Hollda bolǵan lańkestik shabýyldy eskersek, úlken dúmpý Resei men Orta Aziia memleketteriniń bir-birine degen senimine selkeý túsirgenin baiqaýǵa bolady. Máselen, soǵan bailanysty milliondaǵan tájik migranty elden jappai ketip jatyr.
Teraktiden keiingi kúni Sheremetevoǵa qonǵan Qyrǵyzstan azamattary áýejaida bir táýlikten asa shyǵa almaǵan. Buǵan jaýap retinde Qyrǵyzstannyń Syrtqy ister ministrligi otandastaryna Resei eline barmaýǵa keńes bergen edi. Al Reseidegi tájik diasporasy turǵyndaryn burynǵydan da abai bolýǵa shaqyrdy.
Sonymen birge reseilikter tájikterdiń qyzmetinen bas tartyp qana qoimai, olardy uryp-soǵý jaǵdailary da beleń alǵan. Reseilik Mediazona basylymynyń habarlaýynsha, lańkestik áreketten keiin eki kún ishinde quqyq qorǵaýshylarǵa Orta Aziiadan kelgen migranttardan 2500-den astam shaǵym túsken. Negizgi shaǵymdar: politsiianyń negizsiz tekserýleri, zańsyz qamaý, azaptaý jáne deportatsiialaý.
Sonymen qatar Novgorod oblysynyń biligi jańa migranttarǵa patent berýdi doǵaryp, buryn patent alǵandarǵa taksiletip tabys tabýyna, avtobýs júrgizýine, saýda jasaýyna, alkogol jáne temeki ónimderin satýyna tyiym salǵan bolatyn. Tiisti jarlyqqa aimaq gýbernatory Andrei Nikitin qol qoidy. Osylaisha, eńbek migranttary úshin negizgi tabys kózi sanalatyn kásipterge jol jabyldy.
Jarlyqqa sáikes, jumys berýshiler jumysshylarynyń atalǵan sanattaryn biylǵy 26 maýsymǵa deiin jumysynan bosatýǵa mindetteldi. Bul tyiymnyń kúshi Reseide turaqty turýǵa ruqsaty barlarǵa, Eýraziialyq odaqqa kiretin Qazaqstan, Qyrǵyzstan azamattaryna ǵana taralmaidy. Shetel azamattaryna tek qara jumys qalady.
Búginde Tájikstannyń resmi biligi alańdaýǵa negiz joq dep sendirse de, satylǵan biletter sanyna qaraǵanda, Resei tájikter úshin úreili memleketke ainalǵanyn ańǵarýǵa bolady. Munda nápaqasyn tabýǵa baratyn adamdar sany aitarlyqtai azaiǵan.
