Jiynǵa karer ieleri, jeke kásipkerler, oblystyq máslihattyń depýtattary, qoǵam belsendileri, memlekettik organdardyń ókilderi qatysty.
Basqosýda oblystyq jer qatynastary basqarmasynyń basshysy Esemurat Dúzmaǵambetov óńirde ornalasqan ken oryndaryn igerý máselelerine toqtaldy.
Oblys aýmaǵynda 258 karer bar. Sonyń ishinde 37-siniń jumysy toqtap tur. Qalǵan 221 karerdiń jumys jasaýǵa tolyq múmkindigi bar, alaida 2020 jyldyń esebi boiynsha olardyń 103-inde óndirý jumystary múldem júrgizilmegen.
Respýblika boiynsha áktas tek qana Mańǵystaý oblysynda óndiriledi.
Áktas-ulýtastyń iri ken oryndary Qaramandybas, Jetibai jáne Beineýde shoǵyrlanǵan. Al qurylys tasynyń (sheben) ken oryndary Taýshyq, Shetpe aýyldarynyń mańynda ornalasqan.
Mańǵystaý aýdany Shetpe aýylynyń mańynda 29 karer bar. Qazirgi tańda onyń 11-i jumys istep tur. Jergilikti turǵyndar karer ieleriniń ekologiialyq talaptardy buzǵany týraly birneshe ret shaǵymdanǵan.
Sonymen qatar kásiporyndardyń basshylaryna karerlerdegi shańdy basýǵa arnalǵan arnaiy sý qondyrǵylarymen jabdyqtaý tapsyrylǵan. Bul ádis – shań kólemin 60-80% azaitýǵa múmkindik beredi. Sondai-aq, óndiris aýmaǵynyń ishki joldaryna asfalt tóseý jáne shań bolmaýy úshin avtokóliktiń dóńgelekterine sý seýip otyrýǵa nusqaý berilgen. Alaida, búgingi kúnge deiin qoiylǵan barlyq talaptar oryndalmaǵan.
Zertteý nátijeleri boiynsha aiyna bir gektar jerge 58 keliden astam shań tússe, bul ekologiialyq jaǵdaiǵa áser etedi.
Jiynda sóz alǵan aimaq basshysy kásipkerlerdi qorshaǵan ortaǵa ziian keltirmei, zańnamada belgilengen barlyq talaptardy saqtai otyryp jumys isteýge shaqyrdy.
– Ókinishke orai, keibir karer ieleri sanitarlyq normalardy buzyp otyr, mundai faktiler bar. Aýdan ákimdigine karerden shyǵatyn barlyq joldarǵa baqylaýdy kúsheitýdi jáne kólikterge shamadan tys júk tielýine jol bermeýdi tapsyramyn. Barlyq menshik ieleri ózderiniń jaýapkershiligin jáne qoldanystaǵy zańnamanyń talaptaryn, sonyń ishinde shańdy basý qajettiligin bilýi kerek. Karer ieleriniń nemquraily qaraýynan irgeles jatqan eldi mekenderdiń turǵyndary zardap shegýde. Sondyqtan baqylaýdy kúsheitý kerek. – dedi Nurlan Noǵaev.
Jiyn sońynda aimaq basshysy jaýapty tulǵalarǵa birqatar naqty tapsyrmalar júktedi.
