1 qyrkúıek – Bilim kúni qarsańynda Mańǵystaý oblysynda bes jańa mektep ashyldy. Onyń tórteýi Memleket basshysy Qasym-Jomart Toqaevtyń bastamasymen júzege asyrylǵan «Keleshek mektep» ulttyq jobasy aıasynda salynsa, bireýi demeýshilerdiń qoldaýymen boı kóterdi,- dep habarlaıdy Dalanews.kz

Jańa bilim nysandarynyń biri – Beıneý aýdany Sam aýylyndaǵy 300 oryndyq mektep. Ashylý rásimine oblys ákimi Nurdáýlet Qılybaı, ardagerler, ustazdar men aýyl turǵyndary qatysty.

Saltanatty jıynda oblys ákimi jınalǵandardy bilim kúnimen quttyqtap, jańa mektepterdiń óńir úshin mańyzdylyǵyn atap ótti.

- Memleket basshysy bilim salasyn damytýǵa árqashan aıryqsha kóńil bóledi. Búgin paıdalanýǵa berilip otyrǵan jańa mektepter – osy qamqorlyqtyń naqty nátıjesi. Prezıdenttiń tapsyrmasymen salynǵan zamanaýı bilim ordalary shalǵaıda jatqan aýyldarǵa da jetip, balalardyń sapaly bilim alýyna múmkindik berip otyr. Bul bilim ordasynda shákirtterdiń jan-jaqty damýyna, muǵalimderdiń shyǵarmashylyqpen eńbek etýine barlyq jaǵdaı jasalǵan. Osy shańyraqtan túlep ushatyn túlekter elimizdiń damýyna úles qosatyn bilimdi de otanshyl azamat bolady dep senemin. Barshańyzdy bilim kúnimen quttyqtaımyn, jańa oqý jyly sátti ári tabysty bolsyn, – dedi Nurdáýlet Qılybaı.

Sam aýylyndaǵy mektepte qazirgi tańda 151 oqýshy bilim alýda, 40 pedagog eńbek etedi. Mektepte 27 oqý kabıneti, 18 qosymsha bólme, hımıa, bıologıa, ınformatıka, robototehnıka, STEM, óner jáne mýzyka synyptary qarastyrylǵan. Sonymen qatar logoped pen psıholog kabınetteri, sport jáne akt zaly, ashana, kitaphana, sheberhana, medısınalyq bólme men murajaı bar.

Budan bólek, jańa oqý jyly qarsańynda Aqtaý qalasynyń «Raýan» shaǵyn aýdanynda – 300 oryndyq, Munaıly aýdanynyń Batyr aýylyndaǵy «Samal» shaǵyn aýdanynda – 1200 oryndyq, Beıneý aýylynda – 600 oryndyq jáne Túpqaraǵan aýdanynyń Saıyn-SHapaǵatov aýylynda demeýshilerdiń qoldaýymen 1200 oryndyq mektep ashyldy. Bul nysandardyń iske qosylýy Munaıly men Túpqaraǵan aýdandarynda úsh aýysymdy oqytýdy tolyqtaı joıylyp, Beıneý aýdanyndaǵy bir apatty mekteptiń máselesin sheship otyr.

Jalpy, jańa oqý jylynda Mańǵystaý oblysynda 157 mektep jumysyn bastady. Óńirde 213 myńnan astam oqýshy bilim alýda, olardyń 19 myńy alǵash ret mektep tabaldyryǵyn attady. Sonymen qatar oqý jylynyń alǵashqy toqsanynda taǵy bes jańa mektep paıdalanýǵa berilmek.