Kórshi óńirlerden ákelinetin arpa men kebektiń baǵasy qymbattap ketken. Sharýalar buryn 1600 teńge turatyn bir qapshyq kebekti qazir 2200 teńgeden satyp alýda. Jem-shóp jep jarytpaǵan álsiz mal 10 shaqyrym jerde turǵan qudyqqa sý ishýge jete almaı jolda aram qatýda. Máselen, bul jerde 30-ǵa jýyq maldyń óleksesi jatyr. Dál osylaı jalǵasa berse sharýalar kelesi jyly mal qalmaýy múmkin dep boljam aıtyp otyr.
"Borjaqty" jerindegi ata kásipti jalǵap otyrǵan 20-ǵa jýyq sharýa qojalyǵyna bıylǵy jaz ońaıǵa soqpady. Jem-shóptiń jetispeýshiliginen sharýalardyń maly qynadaı qyrylýda. Kórshi óńirlerden satyp alǵan arpa men kebektiń ózin ólshep berip otyr. Sebebi, artyq qor joq.
“Qazir ketip jatqan maldyń esebi joq. Bul qarqynmen kete berse, kelesi jylǵa deıin Mańǵystaýda mal qalmaıdy. Al basqa jaqtan mal ákelip Mańǵystaýǵa budan keıin mal ósire almaısyń. Ákimniń bergen 92 teńgeden bergen arpasy 30 móshek sharýa basyna. Ol 30 móshek on kúnge ǵana jetedi”, – deıdi sharýa Berdihan Alenov
Sharýalar satyp alaıyn dese, artyq azyq taba almaıdy. Sondyqtan alǵan jemin tórt-túligine ólshep berýde. Qystyń qamyn qazirden jasap, artyq azyqty kóptep ákelmese bolmaıdy dep otyr. Osyǵan deıin bir qystan shyǵýǵa 200-300 qapshyq jem jetse, bıyl ol da azdyq etýi múmkin. Sebebi, jazda durys jem-shóp jep qarny maılanbaǵan mal qysqy ýaqytqa eki ese talap etedi eken. Qazir úkimetten ólshenip berilip jatqan sýbsıdıa jyrtyǵymyzdy jamaýǵa jetpeı otyr, deıdi sharýalar.
“Sýbsıdıa beremiz dep jatyr. 9143 pa 9145 teńge me, ol bir kúndik jemine de jetpeıdi. Biz ánsheıin jem, ánsheıin shóp suramaımyz, mol qylyp taýyp berse. Qazir kelip jatqandar qymbat. Bir móshegi 20 kılolyq kebekti 2300 teńgege alyp otyrmyz. Oǵan deıin 1600 teńgeden alǵanbyz”, – deıdi sharýa Serik Aıdarov.
Sharýalar kórshi óńirlerden ákelinetin mal azyǵynyń jol shyǵynyn jergilikti bılik ótep berse deıdi. Sonda ortadaǵy deldaldar ústine aqsha qospaı, jem-shópti bastapqy baǵasymen alar edik dep otyr. Jaýaptylar bul jaǵyn retteımiz degenge keltirdi.
“Alǵashqy jergilikti búdjetten oblys ákiminiń qoldaýymen birinshi kezekte 600 mln teńge qarajat daıyn. Kelesi aptadan bastap operatorlardy taǵaıyndap solar arqyly shóp daıyndap ákelip bul endi qorǵa daıyndyq. Biz ony ákelip srazý halyqqa usynbaımyz. Qorǵa daıyndyq árbir bes aýdanǵa bólip qoıamyz”, – dedi Mańǵystaý oblysy aýyl sharýashylyǵy basqarmasynyń basshysy Serik Qaldyǵul.
Jaýaptylardyń aıtýynsha, budan bólek 1,4 mlrd. teńge taǵy qosymsha qarjy bólinedi. Sonda jalpy somasy 2 mıllıardqa qysqa azyq daıyndalady. Al buǵan deıin aram qatqan malǵa ótemaqy qarastyrylmaǵan.
