Rinat Serikulynyń mamandyǵy – zańger. Biraq joǵary oqý ornyn támamadaǵan soń eńbek jolyn qurylys salasynda bastady. «Buǵan uzaq jyl qurylysta jemisti jumys istegen ákemniń tálimi áser etti», deidi ózi. Búginde irgeli BI-group qurylys kompaniiasynda bólim basqaratyn mamanmen zaýyttaǵy qarbalas jumys arasynda tildestik. Biz barǵanda jumysshylar kezekti blokty quiyp, jóneltýge daiarlap jatty.
– Áńgimemizdi kúndelikti jumys jaiynan bastasaq.
– Brigada eki aýysymmen jumys isteidi. Kúndizgi aýysymdaǵylardyń keshke deiin ázirlegen blogyn túngi aýysymǵa shyǵatyn jumysshylar jalǵastyrady. Eń aldymen bloktyń, iaǵni kóp qabatty úi páterleri bólmesiniń qalybyna armatýra toqylady. Odan keiin beton quiylyp, keptiriledi. Esik, terezesi salynyp, jinaqtaýshy top kem-ketigin bútindep, árleidi de montajdaýǵa jiberiledi. Qurylys basynda daiyn bólmeler belgili bir tártippen qalanyp, kóp qabatty úi ósip shyǵady.
– Sizdiń joǵary oqý ornyn zańger mamandyǵy boiynsha támamdap, baǵyńyzdy qurylys salasynda synaǵanyńyz tańdandyryp otyr.
– Ákem bala kúninen qurylysshy bolýdy qalap, osy salanyń bilikti mamanyna ainaldy. Sol kisiniń eńbek jolyna qatty qyzyqtym. Jalpy árkim óz salasynyń maitalmany bolǵanda ǵana qurmetke bólenedi, ataq ta alady, ortasyna da syily bolady. Ákem sondai kisi boldy. Sonyń yqpaly shyǵar, men de zańgerlikti emes, qurylysty tańdadym.
– Balalaryńyz sizdiń jolyńyzdy jalǵap, qurylysshy bolǵysy kele me?
– Alty balamyz bar, solardyń ishinde qyzdarym ǵana ázirge qurylys, onyń ishinde dizain mamandyǵyn tańdap, keleshekte osy kásipte eńbek etýge talpynyp júr.
Uldarym basqa mamandyqty tańdaityn sekildi, qalaýlary bilsin. Biz eshqashan májbúrlep myna mamandyqty iger demeimiz.
Astana qalasyndaǵy birneshe kórkem stil, ózgeshe dizaindaǵy turǵyn úi keshenderiniń salynýyna bizdiń de septigimiz tidi. Balalarym synybynda apaiyna, dostaryna: «Mynaý meniń ákemniń salǵan úii, ǵimaraty», dep maqtanyshpen aitady eken. Sony estigende tóbem kókke jetkendei boldy.
– Biyl «Jumysshy mamandyqtar jyly», jas mamandardyń qurylys órisine qyzyǵýshylyǵy qanshalyqty?
– Óte qarqyndy ne bolmasa tym baiaý dep te aitýǵa kelmeidi. Jalpy jastarǵa qaraǵanda orta býyn ókilderiniń qurylysta jumys isteýge degen suranysy joǵary. Keiingi tolqyndy qyzyqtyra bilý kerek shyǵar. Aqparattyq nasihat júrgizilip, kolledjderde, joǵary oqý oryndarynda qurylys salasynyń mamandyǵymen bilim alýshy jastardy zaýyttarǵa, qurylys nysandaryna aparyp kórsetip, tájiribeli qurylysshylarmen kezdesý uiymdastyrsa, jumysshy mamandyqtarǵa qyzyǵýshylyq artpasa kemimes edi.
Menińshe, jastardyń kóz aldyna qurylys salasy dese, lai batpaq shylap, qysh kóteretin aýyr jumys elesteidi. Bizdiń zaýytta barlyq protsess zamanaýi tehnologiiamen qamtylǵan, kompiýtermen basqarylady. Eńbekaqy naryq talabyna sai eseptelip, ai saiyn keshikpei beriledi, zaýyttan úige deiin tasymaldaityn kólik bar.
Arnaiy kiim, qural-jabdyqpen qamtamasyz etedi. Tek bilek túrinip, erinbei eńbek etseń jetkilikti. Qurylys – elimizdiń eń qarqyndy damyp kele jatqan salasy. Keleshekte jastarymyz aldyńǵy býyndy almastyryp, osy isti ary qarai jalǵaýy kerek. Sondyqtan da keiingi tolqyndy qurylysta eńbek etýge shaqyramyn.
