Ulttyq qaýipsizdik komiteti Shekara qyzmetiniń burynǵy direktory, sottalǵan Darhan Dilmanovtyń bostandyqqa shyqqany týraly habar tarady. Ol 2014 jyldyń qazanynan 2022 jyldyń sáýirine deiin atalǵan qyzmetke jetekshilik etip, sol jyly maýsym aiynda tutqyndalǵan bolatyn, dep habarlaidy Dalanews.kz kursiv.media-ǵa silteme jasap.
Ótken jyldyń jeltoqsanynda Áskeri sot ony "biligin asyra paidalanyp, memleketke orasan zor shyǵyn keltirdi" degen aiyppen tórt jylǵa bas bostandyǵynan aiyrý jazasyna kesken edi. Sonymen qatar sot úkimimen general-leitenant sheninen, II dárejeli "Aibyn" ordeninen jáne "QR UQK ardageri" ataǵynan da qaǵylǵan-dy. Bul is boiynsha odan bólek taǵy birneshe laýazymdy tulǵa jaýapqa tartylyp, olarǵa aiyppuldan bastap, bostandyǵyn shekteý men aiyrý jazasy taǵaiyndalǵan.
Qylmystyq istiń tutanýyna qazaq-qytai shekarasyndaǵy ótkizý beketterinde anyqtalǵan zańsyzdyqtar sebep bolǵan. Almaty garnizonynyń Áskeri soty keltirgen derekke súiensek, D.E. esimdi azamat Dilmanovqa Qytaidan Qazaqstanǵa zańsyz júk tasymaldaýdyń aila-sharǵysyn usynyp, odan belgili bir mólsherde tabys túsip turatynyna ýáde bergen. Osy zańsyz árekettiń kesirinen júk kólikteri shekaradan tysqary shyqpai, jalpy kezekti ainalyp ótip, 1750 ret ainalmaly reis jasaǵan. Saldarynan memleket qazynasyna iri kólemde zalal kelgeni anyqtaldy.
Darhan Dilmanov 1969 jyly Qyzylorda qalasynda dúniege kelgen. KSRO Memlekettik qaýipsizdik komitetiniń Máskeý joǵary shekara komandalyq ýchilishesin, Qorqyt Ata atyndaǵy Qyzylorda memlekettik ýniversitetin jáne RF Federaldyq qaýipsizdik qyzmetiniń Shekara akademiiasyn támamdaǵan. Eńbek jolyn 1986 jyly bastap, UQK shekara áskerinde ofitserlik qyzmetter atqardy. 1998 jyldan 2014 jylǵa deiin Shekara qyzmetinde túrli basshylyq laýazymda bolyp, sońǵy segiz jylda qyzmet direktory qyzmetin atqardy
