ۇلتتىق قاۋىپسىزدىك كوميتەتى شەكارا قىزمەتىنىڭ بۇرىنعى ديرەكتورى، سوتتالعان دارحان ءدىلمانوۆتىڭ بوستاندىققا شىققانى تۋرالى حابار تارادى. ول 2014 جىلدىڭ قازانىنان 2022 جىلدىڭ ساۋىرىنە دەيىن اتالعان قىزمەتكە جەتەكشىلىك ەتىپ، سول جىلى ماۋسىم ايىندا تۇتقىندالعان بولاتىن، دەپ حابارلايدى Dalanews.kz kursiv.media-عا سىلتەمە جاساپ.

وتكەن جىلدىڭ جەلتوقسانىندا اسكەري سوت ونى "بيلىگىن اسىرا پايدالانىپ، مەملەكەتكە وراسان زور شىعىن كەلتىردى" دەگەن ايىپپەن ءتورت جىلعا باس بوستاندىعىنان ايىرۋ جازاسىنا كەسكەن ەدى. سونىمەن قاتار سوت ۇكىمىمەن گەنەرال-لەيتەنانت شەنىنەن، II دارەجەلى "ايبىن" وردەنىنەن جانە "ق ر ۇقك ارداگەرى" اتاعىنان دا قاعىلعان-دى. بۇل ءىس بويىنشا ودان بولەك تاعى بىرنەشە لاۋازىمدى تۇلعا جاۋاپقا تارتىلىپ، ولارعا ايىپپۇلدان باستاپ، بوستاندىعىن شەكتەۋ مەن ايىرۋ جازاسى تاعايىندالعان.

قىلمىستىق ءىستىڭ تۇتانۋىنا قازاق-قىتاي شەكاراسىنداعى وتكىزۋ بەكەتتەرىندە انىقتالعان زاڭسىزدىقتار سەبەپ بولعان. الماتى گارنيزونىنىڭ اسكەري سوتى كەلتىرگەن دەرەككە سۇيەنسەك، د.ە. ەسىمدى ازامات ءدىلمانوۆقا قىتايدان قازاقستانعا زاڭسىز جۇك تاسىمالداۋدىڭ ايلا-شارعىسىن ۇسىنىپ، ودان بەلگىلى ءبىر مولشەردە تابىس ءتۇسىپ تۇراتىنىنا ۋادە بەرگەن. وسى زاڭسىز ارەكەتتىڭ كەسىرىنەن جۇك كولىكتەرى شەكارادان تىسقارى شىقپاي، جالپى كەزەكتى اينالىپ ءوتىپ، 1750 رەت اينالمالى رەيس جاساعان. سالدارىنان مەملەكەت قازىناسىنا ءىرى كولەمدە زالال كەلگەنى انىقتالدى.

دارحان ءدىلمانوۆ 1969 جىلى قىزىلوردا قالاسىندا دۇنيەگە كەلگەن. كسرو مەملەكەتتىك قاۋىپسىزدىك كوميتەتىنىڭ ماسكەۋ جوعارى شەكارا كوماندالىق ۋچيليششەسىن، قورقىت اتا اتىنداعى قىزىلوردا مەملەكەتتىك ۋنيۆەرسيتەتىن جانە رف فەدەرالدىق قاۋىپسىزدىك قىزمەتىنىڭ شەكارا اكادەمياسىن ءتامامداعان. ەڭبەك جولىن 1986 جىلى باستاپ، ۇقك شەكارا اسكەرىندە وفيسەرلىك قىزمەتتەر اتقاردى. 1998 جىلدان 2014 جىلعا دەيىن شەكارا قىزمەتىندە ءتۇرلى باسشىلىق لاۋازىمدا بولىپ، سوڭعى سەگىز جىلدا قىزمەت ديرەكتورى قىزمەتىن اتقاردى