Dál osy máselege bailanysty túneýkúni Penjim aýylynda Almaty oblysy ákiminiń orynbasary Batyrjan Baijumanov pen aýdan ákimi Talǵat Ómiráliev aýylda turatyn qazaq pen uiǵyrdyń basyn qosyp jiyn ótkizdi. Bul jiyndy Azattyq tilshisi Asylhan Mamashuly jasaǵan tikelei efirden kórýdiń sáti tústi.
Jinalys bastalmai turyp Asylhan Mamashulyna shaǵyn suhbat bergen Panfilov aýdany Talǵat Ómiráliev meketepte bolǵan oqiǵadan keiin aýyl jastary jinalyp, buzaqylyq árketke barǵanyn aitty.
Al jinalys bolardyń aldynda jergilikti uiǵyr áielder qazaq balalar mektepte ózderiniń balalaryna qaǵyp-soǵyp, álemjettik jasaitynyn aityp shaǵyndy. Osy bir jaittan Penjim aýylynda úlkenderdi bylai qoiyp, balalardyń kelispei júrgeninen aýyldaǵy tárbie máselesi qatty aqsaǵany kózge uryp turdy.
Jinalysty tikelei efir barysynda bastan-aiaq kórgenimizde Penjim aýylynda emes, Panfilov aýdanynda biraz ulatarlyq qatynasqa syna qaǵatyn máseleniń bar ekenine kózimiz jetkendei boldy.
Aýyl halqy uiyǵyrlar qazaq taksige minbese, qazaqtardyń uiǵyr taksisterge minbeitinin jasyrmai aitty. Qazaqtyń dúkenine uiǵyrlar, uiǵyrdyń dúkenine qazaqtar kelip zat almaidy eken. Kezinde meshitte de osyndai jaǵdai oryn alyp, keiinnen eki meshitti qosyp bir meshit jasapty. Uzyn sózdiń qysqasy aýdanda uiǵyrlardyń bólektenip, jeke taksige minip, bólek ashanaǵa baratynyn estigenimizde jaǵamyzdy ustaǵandai boldyq.
Osy rette Panfilov aýdany ákimdiginde aq jaǵalylardyń ulatarlyq tataýlyqty saqtaýǵa qatysty biraz jumysty qojyratyp alǵanyna kózimiz anyq jetkendei boldy.
Aitpaqshy, aýyl turǵyndary (qazaq pen uiǵyr) ashy shyndyqty aitýǵa umytylǵan sátinde Panfiov aýdanynyń ákimi Talǵat Ómiráliev «jinalysty jaýyp, ketip qalamyn» dep halyqqa mindetsigenin túsine almadyq.
Oblys ákimi Amandyq Batalov osy jinalysqa Ómirálievti arqasyna myltyq taqap, zorlyqpen ákelmegeni anyq qoi. Máseleniń tigisin jatqysyzyp, qazaq pen uiǵyrdy jarastyrady degen ákim qarapaiym halyqqa «ketip qalamyn» dep bir emes eki ret qaitalap aitqanynan Ómirálievtiń anaý aitqandai bitimger emes ekenin baiqadyq. Kúieýinen taiaq jegen shaipaý áielder «ketip qalamyn» dep qorqytýshy edi. Al mundai sózdiń bildei ákimniń aýzynan shyǵýy qyzyq eken.
Eń bolmaǵanda Memleket basshysy Qasym-Jomart Toqaevtyń «Halyq únine qulaq asatyn memleket» tujyrymynan habarsyz ba dep qaldyq. Toqaevtyń tujyrymdamasynan tolyqtai habardar bolsa, ákim mundai áreketke barmas edi. Qaita jinalysqa qatysqan belgili aitysker Jandarbek Bulǵaqov jurtty sabyrǵa shaqyrǵannan keiin, zal tynyshtalǵandai boldy.
Penjimdik jastar Taldyqorǵannan at terletip jetken Batyrjan Baijumanovqa aýyl mektebiniń Abdolla Rozbakiev atymen atalýy da jasóspirimdar arasyndaǵy kikiljińge jii sebepshi bolyp otyrǵanyn aitty. Budan basqa aýyldaǵy kóshe attaryna da qazaq tilinde ataý berýdi usyndy. Óz keziginde Batyrjan Baijumanov bul máseleni qarastyrýǵa ýáde berdi.
Jinalysty tikelei efirden kórgenimizde Jarkentte kezek kúttirmei sheshetin máseleler kóp ekenine kimniń de bolsy kózi jetkeni anyq.
Al mundai máseleni jurtty «ketemin» dep qorqytatyn Ómirálivtiń komandasy sheshe ala ma? Oǵan baǵa berý qiyn. Qalai bolǵanda Jarkenttegi qazaq pen uiǵyrdy tatýlyqpen yntymaqqa úndeitin ideologiia kerek ekenin sezindik.
Nurlan Jumahanov
