Májilistegi "Aq jol" fraksıasynyń jetekshisi Azat Perýashev Kólik mınıstrligine aýyr aıyp taqty. Depýtat quzyrly vedomstvo otandyq tasymal naryǵyn Reseı men Belarýs kompanıalarynyń jaýlaýyna septesýde dep esepteıdi. Sóıtken ol bul sóziniń dáleli retinde birneshe mysal da keltirdi, dep habarlaıdy Dalanews.kz.
"Keıbir júıeli problemalar boıynsha biz memlekettik organdardyń áreketsizdigine nemese olardyń máseleniń ózektiligin túsinbeýine baılanysty depýtattyq saýaldarymyzdy qaıtara joldaýǵa májbúrmiz. Atap aıtqanda, 2024 jyly 20 qarasha men 18 jeltoqsanda "Aq jol" fraksıasy Reseı jáne Belarýs tarapynan josyqsyz básekelestikke tap bolǵan qazaqstandyq júk tasymaldaýshylardyń nuqsan kelgen múddelerin qorǵap, depýtattyq saýaldar joldady. Bul halyqaralyq tasymaldarǵa ruqsat blankilerin berýdiń jańa tártibine, qazaq-qytaı shekarasyndaǵy elektrondyq kezekke jáne Reseı Federasıasy men Belarýs aýmaǵy boıynsha jol júrý sharttaryna (qazaqstandyq júrgizýshilerdi aýystyrý, tek qazaq tasymaldaýshylar úshin qaıta tirkeýge jáne qaıta tıeýge tyıym salý jáne t.b.) qatysty. Nátıjesinde, naryqty kórshi EAEO elderiniń iri kompanıalary basyp aldy, al negizinen shaǵyn jáne orta bıznes ókilderi bolyp tabylatyn otandyq kásipkerler barlyq jerde yǵystyrylyp, shettetilip, jumysynan aıyrylýda", - dedi Perýashev sársenbidgi Májilis otyrysynda.
Nátıjesinde, ol Qazaqstannyń tranzıttik áleýetine jáne mıllıardtap ınvestısıa salǵan Batys Eýropa-Batys Qytaı trassasynan qazaqstandyq tasymaldaýshylar emes, kez kelgen bóten paıda kórip qaryq ekenin basa aıtady.
"Biz joldaǵan saýaldarymyzǵa jaýap aldyq, biraq jaǵdaı túzelmegen, kerisinshe nasharlaı túsýde, oǵan osy salanyń 400-den astam kásipkeriniń jaqynda jasaǵan úndeýi dálel", - dedi depýtat.
Ol taǵy bir mysal keltire ketti.
"6 qarasha, 12 aqpan jáne 5 naýryz kúnderi biz Premer-mınıstrge jáne Bas prokýrorǵa jeke temir joldardy basyp alý, jeke tasymaldaýshylardy yǵystyrý jáne tranzıttik tasymaldarǵa quqyqty tek QTJ atynan memlekettik monopolıaǵa bekitý jónindegi Kólik mınıstrliginiń zańsyz áreketterine shaǵymdanyp, saýaldar joldadyq. Kólik mınıstriniń buıryǵy memlekettik jáne jeke menshik teńdigi men teńdeı qorǵalýyn tikeleı bekitetin Konstıtýsıadan jáne Úkimettiń ekonomıkaǵa qatysýyn qysqartý jáne ádil básekelestikti qamtamasyz etý mindetin qoıǵan Prezıdenttiń "ekonomıkany yryqtandyrý týraly" Jarlyǵynan joǵary bolǵany ma?"- dep surady májilismen.
Sondaı-aq, ol 6 qarasha men 26 aqpanda fraksıa monopolıs – "Jambyl elektr jelileri" JSHS-niń, josyqsyz áreketterine qatysty depýtattyq saýal joldady. Ol "Fabrıka POSH" (jún tútetin, óńdeıtin fabrıka) JSHS-ny reıderlik jolmen basyp alý áreketine barýda.
"Bizdiń sol saýaldarymyzǵa jaýap qatqan monopolıaǵa qarsy organ da, Energetıka mınıstrligi de bul buzýshylyqtardy baıqamaǵanyn aıtady, áıtpese bul kózge birden kórinetin ap-anyq ekonomıkalyq nonsens: myna arada barlyq qadaǵalaý vedomstvolary monopolıske basqa tulǵa kórsetetin qyzmet úshin aqy alýǵa múmkindik berip otyr. Iá, kásiporyndardy qorǵaýdyń ornyna, Energetıka mınıstrligi taǵy da tek monopolıske aqy tóleýdi qarastyratyn joldy usynýda. Onda da aınalyp ótetetin jelini óz aqshalaryna saldyrtyp, biraq tarıfti monoplıstke tóletindeı etip degendeı. Nege jún óńdeý fabrıkasynyń ınfraqulymyn tegin qoldanbasqa? Ol týraly eshkim jaq ashpaıdy", - deıdi depýtat.
Onyń aıtýynsha, kásipkerler monopolıs pen jergilikti monopolıaǵa qarsy organdardyń ózara aýyz jalasa áreket etip otyrǵanyn ashyq ashyna aıtýǵa májbúr.
"Bul erekshe jaǵdaı emes, máselen Túrkistan oblysynyń Saryaǵash aýdanyndaǵy "Altyn Bulaq" shıpajaıyn alaıyq. Bul arada da tabysty bıznesti basyp alý úshin ákimshilik ókilettikter paıdalanylǵan jaǵdaılar bar, bul týraly biz úsh márte saýal joldadyq. Memlekettik organdardyń resmı jaýaptaryna qaramastan, "Aq jol" fraksıasy mundaı faktilerge qarsy turýdy jalǵastyrady", - dedi Perýashev sóz sońynda.
Aıta ketsek, 14 qańtarda Kólik mınıstri Marat Qarabaev pen Avtomobıl kóligi jáne kóliktik baqylaý komıtetiniń tóraǵasy Altaı Álı, sondaı-aq "qazaqstandyq" fırmalar retinde ózin kórsetken Belarýs pen Reseı fırmalary Qaýipsizdik keńesine shaǵymdanǵanyn habarlaǵan edi.
