Jetisýda Naýryznama onkúndigin merekeleý aiasynda oblys kóleminde 240-qa jýyq túrli is-sharalar ótkizý josparlanǵan,- dep habarlaidy Dalanews.kz
Atap aitqanda, óńirde 5 myńǵa jýyq aǵash kóshetteri otyrǵyzylady, qaiyrymdylyq jáne ekologiialyq aktsiialar, áleýmettik marafondar ótkiziledi, kontsertter, sporttyq jarystar, kórmeler uiymdastyrylady, sol siiaqty 60 otbasyna jańa úilerdiń kilti beriledi. Bul rette otbasy institýtyn, ulttyq mádeni dástúrler men qundylyqtardy nasihattaýǵa erekshe kóńil bólinbek.
Oblystyq mádeniet, arhivter jáne qujattama basqarmasynyń málimetinshe, Naýryznamanyń jalpyulttyq onkúndigi aiasynda óńirdegi Naýryz merekesi búkil eldegidei 14 naýryzda «Kórisý – Amal merekesimen» bastalyp, 23 naýryz «Tazarý kúninde» aýqymdy ekologiialyq aktsiiamen túiindeledi.
«Jalpy óńirde biyl túrli baǵyttaǵy 234 is-shara ótkiziledi. Mysaly, Mádeniet jáne ulttyq dástúr kúni aiasynda Jetisý oblysynda alǵash ret bir mezgilde 300 balanyń «tusaýyn kesý» rásimi atqarylady. «Shańyraq» kúninde oblys ortalyǵynda 60 otbasy jańa baspanaǵa ie bolady. «Ulttyq kiim kúni» Taldyqorǵannyń ortalyq alańynda ulttyq kiimder sherýi, sondai-aq M.Tynyshbaev atyndaǵy tarihi-ólketaný murajaiynda «Kimeshek» kórmesi uiymdastyrylady. Oǵan qosa jalpy oblys boiynsha ulttyq kiimdi jáne onyń paida bolý tarihyn nasihattaýǵa baǵyttalǵan túrli chellendjder, kezdesýler ótkiziledi. «Yntymaq kúni» merekesi «Naýryz kerýeni» aýqymdy sherýimen aishyqtalady. Naýryz merekesiniń keń kólemde, jappai buqaralyq sipatta atap ótiletin kúni - 22 naýryz. Bul basty mereke Taldyqorǵan qalasynyń «Jastar» saiabaǵynda merekelenip, biylǵy jyldyń mereitoilyq datalaryna arnalǵan taqyryptyq kórmeler qoiylǵan 20-dan astam kiiz úi tigiledi», - delingen basqarmanyń habarlamasynda.
Jalpy Naýryzdyń qurmetine merekelik bezendirýge erekshe kóńil bólinbek. Máselen, Taldyqorǵan qalasynyń ortalyq alańynda «Altybaqan» átkenshegi, kiiz úi keipinde aýqymdy installiatsiia ornatylady, sondai-aq jaryq shamdarymen bezendirý jańartylady. Jalpy Taldyqorǵan qalasy, aýdan ortalyqtary, óńirdiń qalalary men aýyldary Naýryzdy, kóktem mezgilin beineleitin túrli shaǵyn sáýlet nysandarymen, sondai-aq merekelik bannerlermen, jalaýshalarmen bezendiriledi. Sonymen qatar, kógaldandyrý jumystary aiasynda biyl óńirde 120 myń kóshet, onyń ishinde Naýryz merekesi kúnderi 5 myń kóshet otyrǵyzý josparlanǵan.
