جەتىسۋدا ناۋرىزناما ونكۇندىگىن مەرەكەلەۋ اياسىندا وبلىس كولەمىندە 240-قا جۋىق ءتۇرلى ءىس-شارالار وتكىزۋ جوسپارلانعان،- دەپ حابارلايدى Dalanews.kz
اتاپ ايتقاندا، وڭىردە 5 مىڭعا جۋىق اعاش كوشەتتەرى وتىرعىزىلادى، قايىرىمدىلىق جانە ەكولوگيالىق اكسيالار، الەۋمەتتىك مارافوندار وتكىزىلەدى، كونسەرتتەر، سپورتتىق جارىستار، كورمەلەر ۇيىمداستىرىلادى، سول سياقتى 60 وتباسىنا جاڭا ۇيلەردىڭ كىلتى بەرىلەدى. بۇل رەتتە وتباسى ينستيتۋتىن، ۇلتتىق مادەني داستۇرلەر مەن قۇندىلىقتاردى ناسيحاتتاۋعا ەرەكشە كوڭىل بولىنبەك.
وبلىستىق مادەنيەت، ارحيۆتەر جانە قۇجاتتاما باسقارماسىنىڭ مالىمەتىنشە، ناۋرىزنامانىڭ جالپىۇلتتىق ونكۇندىگى اياسىندا وڭىردەگى ناۋرىز مەرەكەسى بۇكىل ەلدەگىدەي 14 ناۋرىزدا «كورىسۋ – امال مەرەكەسىمەن» باستالىپ، 23 ناۋرىز «تازارۋ كۇنىندە» اۋقىمدى ەكولوگيالىق اكسيامەن تۇيىندەلەدى.
«جالپى وڭىردە بيىل ءتۇرلى باعىتتاعى 234 ءىس-شارا وتكىزىلەدى. مىسالى، مادەنيەت جانە ۇلتتىق ءداستۇر كۇنى اياسىندا جەتىسۋ وبلىسىندا العاش رەت ءبىر مەزگىلدە 300 بالانىڭ «تۇساۋىن كەسۋ» ءراسىمى اتقارىلادى. «شاڭىراق» كۇنىندە وبلىس ورتالىعىندا 60 وتباسى جاڭا باسپاناعا يە بولادى. «ۇلتتىق كيىم كۇنى» تالدىقورعاننىڭ ورتالىق الاڭىندا ۇلتتىق كيىمدەر شەرۋى، سونداي-اق م.تىنىشبايەۆ اتىنداعى تاريحي-ولكەتانۋ مۇراجايىندا «كيمەشەك» كورمەسى ۇيىمداستىرىلادى. وعان قوسا جالپى وبلىس بويىنشا ۇلتتىق كيىمدى جانە ونىڭ پايدا بولۋ تاريحىن ناسيحاتتاۋعا باعىتتالعان ءتۇرلى چەللەندجدەر، كەزدەسۋلەر وتكىزىلەدى. «ىنتىماق كۇنى» مەرەكەسى «ناۋرىز كەرۋەنى» اۋقىمدى شەرۋىمەن ايشىقتالادى. ناۋرىز مەرەكەسىنىڭ كەڭ كولەمدە، جاپپاي بۇقارالىق سيپاتتا اتاپ وتىلەتىن كۇنى - 22 ناۋرىز. بۇل باستى مەرەكە تالدىقورعان قالاسىنىڭ «جاستار» ساياباعىندا مەرەكەلەنىپ، بيىلعى جىلدىڭ مەرەيتويلىق داتالارىنا ارنالعان تاقىرىپتىق كورمەلەر قويىلعان 20-دان استام كيىز ءۇي تىگىلەدى»، - دەلىنگەن باسقارمانىڭ حابارلاماسىندا.
جالپى ناۋرىزدىڭ قۇرمەتىنە مەرەكەلىك بەزەندىرۋگە ەرەكشە كوڭىل بولىنبەك. ماسەلەن، تالدىقورعان قالاسىنىڭ ورتالىق الاڭىندا «التىباقان» اتكەنشەگى، كيىز ءۇي كەيپىندە اۋقىمدى ينستاللياسيا ورناتىلادى، سونداي-اق جارىق شامدارىمەن بەزەندىرۋ جاڭارتىلادى. جالپى تالدىقورعان قالاسى، اۋدان ورتالىقتارى، ءوڭىردىڭ قالالارى مەن اۋىلدارى ناۋرىزدى، كوكتەم مەزگىلىن بەينەلەيتىن ءتۇرلى شاعىن ساۋلەت نىساندارىمەن، سونداي-اق مەرەكەلىك باننەرلەرمەن، جالاۋشالارمەن بەزەندىرىلەدى. سونىمەن قاتار، كوگالداندىرۋ جۇمىستارى اياسىندا بيىل وڭىردە 120 مىڭ كوشەت، ونىڭ ىشىندە ناۋرىز مەرەكەسى كۇندەرى 5 مىڭ كوشەت وتىرعىزۋ جوسپارلانعان.
