Óskemenniń irgesindegi Vinnoe aýylynda jyl on eki ai úzdiksiz jumys isteitin jabyq at sporty maneji ashyldy. Oǵan aimaq basshysy Ermek Kósherbaev qatysyp, mekemeniń tynys-tirshiligimen tanysty.
– Múmkindigi shekteýli jandardyń densaýlyǵyn nyǵaitý maqsatynda Zaisan aýdanynda da atqa minýdi úiretetin jáne ippoterapiia qyzmetterin usynatyn ortalyq ashylady. Oǵan kelýshiler memlekettik áleýmettik tapsyrys aiasynda em qabyldamaq, – dedi Ermek Kósherbaev.
Munda memlekettik áleýmettik tapsyrys aiasynda 127 bala saýyqtyrý-jattyǵý jiyndaryna qatysyp júr. Osy maqsatta 102 million teńge bólingen. Olardy arnaiy jabdyqtalǵan avtokólikpen alyp kelip, aparyp salady. Ár balamen arnaiy sala mamandary ainalysyp, atqa otyryp júrýdi úiretedi. Aýrýyna bailanysty ár balaǵa jeke baǵdarlama qarastyrylǵan.
«Titan» at sporty kesheniniń bazasyndaǵy balalar men jasóspirimderge arnalǵan atty sport klýbynda 2009 jyldan beri atpen júrýdi úirengisi keletinder úshin aqyly sabaqtar ótetin. Bir kúni osyndai sabaqtardyń birine sal aýrýymen aýyratyn balany ákeledi. Aiaǵy múlde qozǵalmaityndyqtan er-toqymǵa otyrǵyzý múmkin bolmai, ata-anasynyń kómegimen attyń ústinde er-toqymsyz otyryp, biraz serýendedi, - dep eske alady jattyqtyrýshylar. Atqa otyrý unaǵany sonshalyq, kelýdi jiiletti.
Birtindep balanyń uiqysy, tábeti durystalyp, kóńil kúii jaqsardy. Osy jaǵdaidan keiin ózge de múmkindigi shekteýli balalardyń ata-analary habarlasyp, sabaqqa jazylýǵa niet bildirgen. Al klýb jattyqtyrýshylary bolsa, múmkindigi shekteýli balalardy attyń kómegimen ońaltýǵa bailanysty ádistemelik materialdar izdestirip, nátijesinde «Aq Tai» múmkindigi shekteýli balalardy qoldaý qory» qoǵamdyq birlestigi qurylady.
Búginde munda psiholog, nusqaýshy, ádisker, keńesshi, atshy, bapker, meditsina qyzmetkeri siiaqty bilikti mamandar eńbek etedi. Naýqas balalardyń densaýlyǵy men kóńil kúiinde oń nátije baiqalǵan soń, arnaiy baǵdarlama jasalyp, ony júzege asyrýǵa emdik dene shynyqtyrý mamandary men psihologtar tartylady. Aldymen ońaltý sharalaryn qadaǵalap otyrý maqsatynda arnaiy qujat toltyrylyp, oń nátijeler jazylyp otyrady. Osyndai taldaý jumystarynyń negizinde múmkindigi shekteýli balalardy ippoterapiia ádisimen ońaltýdyń arnaiy baǵdarlamasyn jasaý múmkin bolǵan.
Salt atpen júrý kezinde olardyń óz-ózine degen senimdiligi artady. Sonyń áserimen balany júrýge, sóileýge beiimdeýge, eń bastysy, kóńil kúilerin kóterýge bolady. Qazirdiń ózinde osyndai dárisiz emdik tásil olardyń ońalyp ketýine shipasy tiip jatqanyn da bilip otyrmyz. Buryn atqa minip kórmegen balalardy atqa minip júrýdi nusqaýshylar úiretedi. Qajet etkender ippoterapiiamen emdeý qyzmetin bizdiń ortalyqta paidalana alady, – dedi «Aq tai» múmkindigi shekteýli balalardy qoldaý qory» qoǵamdyq birlestiginiń tóraiymy Ekaterina Rýdenko.
Oblystyq qoǵamdyq keńestiń múgedek adamdardyń quqyqtaryn qorǵaý jónindegi saraptama komitetiniń tóraiymy Olga Kýzovlevanyń aitýynsha, óńirimizde júzege asyrylyp jatqan ippoterapiia jáne múmkindigi shekteýli jandarǵa arnalǵan at sporty jobasy postkeńestik elder boiynsha aldyńǵy qatarly biregei joba. Tipti, ippoterapiiany qolǵa alǵan álem elderiniń ózinde emdik-atpen júrý sabaqtary qarapaiym at úiretetin manejde nemese shaǵyn telimderde ótedi. Al bizdiń oblys ortalyǵyna jaqyn mańdaǵy Vinnoe aýylynda ornalasqan úlken manej múmkindigi shekteýli jandardy ońaltýǵa arnaiy jasaqtalǵan.
– Jambyl, Aqtóbe, Almaty, Astana qalalarynda ashylǵan dál osyndai ortalyqtyń mamandary Óskemenniń irgesindegi Vinnoe aýylyndaǵy osy manejge kelip, tájiribe jinaqtap, sertifikat alady, – dedi Olga Kýzovleva.
Esterińizge sala keteiik, elimizdiń at sporty boiynsha ulttyq paraolimpiada quramasynyń sapynda tek qana shyǵysqazaqstandyqtar óner kórsetip, bairaqty básekelerden júldemen oralyp júr.
