Astanada «She Rug» atty teńdessiz kórme ashyldy. Ekspozitsiiada qazaqtyń ejelgi qolóneri – kilem toqýdyń barlyq satysy usynyldy. Kórmeni elorda turǵyndary men qonaqtary sol jaǵalaýda ornalasqan ForteBank ǵimaratynda tamashalai alady.
Kórme 17 qazannan 8 qarashaǵa deiin Forte Kulanshi Artspace galereiasynda ótýde. Onyń ashylý saltanatyna óner adamdary jinalyp, qolóner ieleri shyǵarǵan kilemniń túr-túrin tamashalady. Kórmeniń ortalyq bóligi ShyraQ áleýmettik jobasy bolmaq.
ShyraQ – bul qolónerdiń úzdik dástúrlerinde oryndalǵan kilemder arqyly Qazaqstannyń oqiǵalarǵa bai tarihyn jáne erekshe mádenietin jańǵyrtý men saqtaý úshin qurylǵan brend. ShyraQ jobasynyń negizin qalaǵan Sandýǵash Beisenbekovanyń sózinshe, ár kilem Túrkistan oblysynyń ájeleri men jas analarynyń qolymen toqylǵan.
«Kilem fýnktsionaldy turmystyq zat bola tura, qazaq mádenietinde sheberlikti, biregeilikti jáne ýaqyt aǵynyn beineleitin tereń mánge ie. Bul kórme dástúr men avangard stilin úilestire otyryp, kilemdi kúndelikti kózge úirenshikti qalpynan beineleý óneriniń nysanyna ainaldyrady. Basty maqsatym – osy kórmeni shet elderge, onyń ishinde Ulybritaniiaǵa, Frantsiiaǵa aparý. Astanadan keiin Shymkent, Almatyǵa baramyz», - dedi Sandýǵash Beisenbekova.
Kórmede Álibai Bapanov, Málik Muqanov, Botagóz Tólesh, Qundyz Jilybaeva jáne Mereke Aidarsha siiaqty tanymal gobelen sheberleriniń jumystary, sondai-aq ShyraQ jobasynyń qatysýshylary oryndaǵan kilemder usynylǵan. Eksponattardyń arasynda álemdegi eń kóne Pazyryq kileminiń biregei jańǵyrtylǵan jádigerin kórýge bolady.
«She Rug» kórmesi qazaqtyń dástúrli kilem toqý óneriniń kórkem qundylyǵyn kórsetip qana qoimai, sonymen qatar onyń mańyzdy áleýmettik missiiasyna – Qazaqstannyń aýyldyq jerlerinde turatyn áielderdi qoldaý, olardy jumyspen qamtý jáne ejelgi ónerdi saqtap, bolashaq urpaqqa tapsyrý múmkindigine erekshe kóńil aýdarǵan. ForteBank osy mádeni jańǵyrý men ulttyq dástúrlerdi saqtaýǵa yqpal etetin jobany qýana qoldaǵan.
«Biz 2016 jyldan beri óner salasyn qoldap kele jatyrmyz. Forte Kulanshi Artspace galereiasynda alýan túrli sheberler ózderiniń qolónerin, týyndylaryn pash etýde. Biraq búgingi óner kórmesiniń jóni bólek, sebebi ulttyq naqyshtaǵy kilemder kórsetilip jatyr. Al bul – ulttyq ónerdiń bir nyshany. Menińshe, Qazaqstanda turyp jatqan azamattar ulttyq ónerdi qoldap, ulttyq qundylyqtardy jas urpaqqa dáriptei bilýi kerek. Sondyqtan qazaq óneri men mádenietine bei-jai qaramaityn azamattardy kórmege kelýge shaqyramyz», - dedi «ForteBank» AQ basqarma tóraǵasy Bekjan Pirmatov.
Forte Kulanshi Artspace-tegi kórmeniń esikteri 2024 jylǵy 8 qarashaǵa deiin kópshilikke ashyq. Ony kirip, kórý tegin.
