استانادا «She Rug» اتتى تەڭدەسسىز كورمە اشىلدى. ەكسپوزيسيادا قازاقتىڭ ەجەلگى قولونەرى – كىلەم توقۋدىڭ بارلىق ساتىسى ۇسىنىلدى. كورمەنى ەلوردا تۇرعىندارى مەن قوناقتارى سول جاعالاۋدا ورنالاسقان ForteBank عيماراتىندا تاماشالاي الادى.
كورمە 17 قازاننان 8 قاراشاعا دەيىن Forte Kulanshi Artspace گالەرەياسىندا وتۋدە. ونىڭ اشىلۋ سالتاناتىنا ونەر ادامدارى جينالىپ، قولونەر يەلەرى شىعارعان كىلەمنىڭ ءتۇر-تۇرىن تاماشالادى. كورمەنىڭ ورتالىق بولىگى ShyraQ الەۋمەتتىك جوباسى بولماق.
ShyraQ – بۇل قولونەردىڭ ۇزدىك داستۇرلەرىندە ورىندالعان كىلەمدەر ارقىلى قازاقستاننىڭ وقيعالارعا باي تاريحىن جانە ەرەكشە مادەنيەتىن جاڭعىرتۋ مەن ساقتاۋ ءۇشىن قۇرىلعان برەند. ShyraQ جوباسىنىڭ نەگىزىن قالاعان ساندۋعاش بەيسەنبەكوۆانىڭ سوزىنشە، ءار كىلەم تۇركىستان وبلىسىنىڭ اجەلەرى مەن جاس انالارىنىڭ قولىمەن توقىلعان.
«كىلەم فۋنكسيونالدى تۇرمىستىق زات بولا تۇرا، قازاق مادەنيەتىندە شەبەرلىكتى، بىرەگەيلىكتى جانە ۋاقىت اعىنىن بەينەلەيتىن تەرەڭ مانگە يە. بۇل كورمە ءداستۇر مەن اۆانگارد ءستيلىن ۇيلەستىرە وتىرىپ، كىلەمدى كۇندەلىكتى كوزگە ۇيرەنشىكتى قالپىنان بەينەلەۋ ونەرىنىڭ نىسانىنا اينالدىرادى. باستى ماقساتىم – وسى كورمەنى شەت ەلدەرگە، ونىڭ ىشىندە ۇلىبريتانياعا، فرانسياعا اپارۋ. استانادان كەيىن شىمكەنت، الماتىعا بارامىز»، - دەدى ساندۋعاش بەيسەنبەكوۆا.
كورمەدە ءالىباي باپانوۆ، مالىك مۇقانوۆ، بوتاگوز تولەش، قۇندىز جيلىبايەۆا جانە مەرەكە ايدارشا سياقتى تانىمال گوبەلەن شەبەرلەرىنىڭ جۇمىستارى، سونداي-اق ShyraQ جوباسىنىڭ قاتىسۋشىلارى ورىنداعان كىلەمدەر ۇسىنىلعان. ەكسپوناتتاردىڭ اراسىندا الەمدەگى ەڭ كونە پازىرىق كىلەمىنىڭ بىرەگەي جاڭعىرتىلعان جادىگەرىن كورۋگە بولادى.
«She Rug» كورمەسى قازاقتىڭ ءداستۇرلى كىلەم توقۋ ونەرىنىڭ كوركەم قۇندىلىعىن كورسەتىپ قانا قويماي، سونىمەن قاتار ونىڭ ماڭىزدى الەۋمەتتىك ميسسياسىنا – قازاقستاننىڭ اۋىلدىق جەرلەرىندە تۇراتىن ايەلدەردى قولداۋ، ولاردى جۇمىسپەن قامتۋ جانە ەجەلگى ونەردى ساقتاپ، بولاشاق ۇرپاققا تاپسىرۋ مۇمكىندىگىنە ەرەكشە كوڭىل اۋدارعان. ForteBank وسى مادەني جاڭعىرۋ مەن ۇلتتىق داستۇرلەردى ساقتاۋعا ىقپال ەتەتىن جوبانى قۋانا قولداعان.
«ءبىز 2016 جىلدان بەرى ونەر سالاسىن قولداپ كەلە جاتىرمىز. Forte Kulanshi Artspace گالەرەياسىندا الۋان ءتۇرلى شەبەرلەر وزدەرىنىڭ قولونەرىن، تۋىندىلارىن پاش ەتۋدە. ءبىراق بۇگىنگى ونەر كورمەسىنىڭ ءجونى بولەك، سەبەبى ۇلتتىق ناقىشتاعى كىلەمدەر كورسەتىلىپ جاتىر. ال بۇل – ۇلتتىق ونەردىڭ ءبىر نىشانى. مەنىڭشە، قازاقستاندا تۇرىپ جاتقان ازاماتتار ۇلتتىق ونەردى قولداپ، ۇلتتىق قۇندىلىقتاردى جاس ۇرپاققا دارىپتەي ءبىلۋى كەرەك. سوندىقتان قازاق ونەرى مەن مادەنيەتىنە بەي-جاي قارامايتىن ازاماتتاردى كورمەگە كەلۋگە شاقىرامىز»، - دەدى «ForteBank» اق باسقارما ءتوراعاسى بەكجان ءپىرماتوۆ.
Forte Kulanshi Artspace-تەگى كورمەنىڭ ەسىكتەرى 2024 جىلعى 8 قاراشاعا دەيىن كوپشىلىككە اشىق. ونى كىرىپ، كورۋ تەگىن.
