Aqmola oblysynyń politsiiasy qalalyq sot ákimshiliginiń 27 jastaǵy basshysy Aian Dúisekovtiń ózine qol jumsaý faktisi boiynsha sotqa deiingi tergep-tekserýdi qylmystyq quqyq buzýshylyq quramynyń bolmaýyna bailanysty toqtatty, dep habarlaidy dalanews.kz.
Aqmola oblystyq politsiia departamentiniń baspasóz qyzmetiniń málimetinshe, ózine qol jumsaý deregi boiynsha sotqa deiingi tergep-tekserý 13 qyrkúiekte bastalǵan. Tergeý barysynda qajetti protsessýaldyq áreketter júrgizilip, tiisti materialdar jinalǵan.
«Tergeý nátijesinde qylmystyq quqyq buzýshylyq quramynyń bolmaýyna bailanysty qylmystyq is toqtatyldy», - dep habarlady politsiia departamenti.
Buǵan deiin áleýmettik jelilerde marqumnyń týystary oqiǵaǵa onyń jumys ornyndaǵy qysym, tártiptik jaza jáne qyzmettik baspana máselesi sebep bolýy múmkin ekenin jazǵan.
Al Aqmola oblystyq sot ákimshiligi departamenti Aian Dúisekovke eshqandai qysym kórsetilmegenin málimdegen. Vedomstvonyń túsindirýinshe, oǵan eńbek tártibin buzǵany úshin sógis jariialanǵan, al memlekettik páterden shyǵarý máselesi kóterilmegen.
Eske salaiyq, 30 qazanda Aqmola oblystyq sotynyń ishki qaýipsizdik bóliminiń bas mamanynyń máiiti tabylǵan bolatyn. Osy derek boiynsha da politsiia adamdy ózine qol jumsaýǵa deiin jetkizý faktisimen qylmystyq is qozǵaǵan.
Bul - óńirdiń sot júiesinde tirkelgen ekinshi ózine qol jumsaý oqiǵasy.
