Aqsý qalasynda áieldi soqqyǵa jyǵyp óltirgen, keiin qylmystyń izin jasyrý úshin onyń denesin órtemek bolǵan er adamǵa sot úkimi shyqty, dep habarlaidy dalanews.kz.
Kriminalnyi Kazahstan derekkóziniń málimetinshe, oqiǵa 17 sáýirde qala shetindegi jylý qubyrlarynyń mańynda bolǵan. Er adam men áiel birge ishimdik iship otyrǵan kezde aralarynda janjal týyndaǵan. Buǵan áieldiń er adamnyń marqum anasyna til tigizýi sebep bolǵan.
Janjal kezinde er adam áieldiń betinen judyryqpen uryp, keiin denesiniń ár tusynan birneshe ret tepken. Aýyr jaraqat alǵan áiel oqiǵa ornynda kóz jumǵan.
Osydan keiin er adam úiine baryp, dizel otynyn alyp kelgen. Qylmystyń izin jasyrmaq bolǵan ol marqumnyń kiimin sheship, denesine janarmai quiyp, órt qoiǵan.
Sot aiyptalýshyny QR Qylmystyq kodeksiniń 99-babynyń 1-bóligi - "Adam óltirý" boiynsha kináli dep tanydy. Oǵan qaýipsizdigi ortasha mekemede 10 jyl bas bostandyǵynan aiyrý jazasy taǵaiyndaldy.
Sonymen qatar sottalǵan azamattan jábirlenýshi taraptyń paidasyna 5,5 million teńgeden astam ótemaqy óndirildi.
