Qazaqstandyq jas maman Didar Sadyq búginde Oksford ýniversitetinde qazaq tilinen sabaq beredi, dep habarlaidy Dalanews.kz.
Didar Sadyq – shaǵyn Qarashoqy aýylynda týǵan. Balalyq shaǵynan qazaq tiline erekshe qyzyǵyp, bir kúni qazaq tilin búkil álemge tanytýdy armandaǵan.
Ol ál-Farabi atyndaǵy Qazaq ulttyq ýniversitetiniń filologiia fakýltetin támamdap, keiin Ahmet Baitursynuly atyndaǵy Til bilimi institýtynda eńbek etken.
Sol jerde júrgende Didar til ǵylymyn tek zertteý emes, ony álemge tanytýdy maqsat etý qajet ekenin túsingen.
Oksfordtaǵy qazaq tili
Qazir ol Oksford ýniversitetinde qazaq tilinen dáris oqidy. Bul bastama 2024 jyly iske qosylǵan pilottyq joba aiasynda júzege asqan. Atalǵan joba Qazaqstannyń Ǵylym jáne joǵary bilim ministrligi men Oksford ýniversiteti arasyndaǵy kelisim nátijesinde júzege asty.
Jobaǵa Ahmet Baitursynuly atyndaǵy Til bilimi institýtynyń qoldaýy sebep bolǵan. Osy seriktestik arqasynda qazaq tili álemniń eń bedeldi oqý oryndarynyń birinde oqytyla bastady.
Armanǵa ainalǵan eńbek
Didar úshin bul jai ǵana jumys emes – bala kezden kóńilinde júrgen úlken armannyń oryndalýy. Ol Qazaqstannyń tili men mádenietin álemge tanystyrý arqyly eldiń rýhani murasyn dáripteýdi basty boryshy sanaidy.
«Qazaq tilin oqytý – óz mádenietimizdi jetkizýdiń eń ádemi joly», – deidi ol.
