قازاقستاندىق جاس مامان ديدار سادىق بۇگىندە وكسفورد ۋنيۆەرسيتەتىندە قازاق تىلىنەن ساباق بەرەدى، دەپ حابارلايدى Dalanews.kz.

ديدار سادىق – شاعىن قاراشوقى اۋىلىندا تۋعان. بالالىق شاعىنان قازاق تىلىنە ەرەكشە قىزىعىپ، ءبىر كۇنى قازاق ءتىلىن بۇكىل الەمگە تانىتۋدى ارمانداعان.

ول ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن ءتامامداپ، كەيىن احمەت بايتۇرسىن ۇلى اتىنداعى ءتىل ءبىلىمى ينستيتۋتىندا ەڭبەك ەتكەن.

سول جەردە جۇرگەندە ديدار ءتىل عىلىمىن تەك زەرتتەۋ ەمەس، ونى الەمگە تانىتۋدى ماقسات ەتۋ قاجەت ەكەنىن تۇسىنگەن. 

وكسفوردتاعى قازاق ءتىلى

ءقازىر ول وكسفورد ۋنيۆەرسيتەتىندە قازاق تىلىنەن ءدارىس وقيدى. بۇل باستاما 2024 جىلى ىسكە قوسىلعان پيلوتتىق جوبا اياسىندا جۇزەگە اسقان. اتالعان جوبا قازاقستاننىڭ عىلىم جانە جوعارى ءبىلىم مينيسترلىگى مەن وكسفورد ۋنيۆەرسيتەتى اراسىنداعى كەلىسىم ناتيجەسىندە جۇزەگە استى.
جوباعا احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ قولداۋى سەبەپ بولعان. وسى سەرىكتەستىك ارقاسىندا قازاق ءتىلى الەمنىڭ ەڭ بەدەلدى وقۋ ورىندارىنىڭ بىرىندە وقىتىلا باستادى.

ارمانعا اينالعان ەڭبەك

ديدار ءۇشىن بۇل جاي عانا جۇمىس ەمەس – بالا كەزدەن كوڭىلىندە جۇرگەن ۇلكەن ارماننىڭ ورىندالۋى. ول قازاقستاننىڭ ءتىلى مەن مادەنيەتىن الەمگە تانىستىرۋ ارقىلى ەلدىڭ رۋحاني مۇراسىن دارىپتەۋدى باستى بورىشى سانايدى.

«قازاق ءتىلىن وقىتۋ – ءوز مادەنيەتىمىزدى جەتكىزۋدىڭ ەڭ ادەمى جولى»، – دەيدى ول.