Qazaqstan Ulttyq qaýipsizdik komitetiniń Sybailas jemqorlyqqa qarsy is-qimyl qyzmeti sottalǵandardy azyq-túlikpen qamtamasyz etýge jaýapty «Eńbek» RMK basshylaryn ustady. Bul týraly BÁSE basylymy óz derekkózderine silteme jasap málimdedi, dep habarlaidy dalanews.kz.
Basylym málimetinshe, 5 qarashada kásiporynnyń bas direktory Ermek Shurmanov pen azyq-túlikpen qamtamasyz etý basqarmasynyń basshysy Fýrkat Hýdaibergenov ustalǵan. Derekkózderdiń aitýynsha, olar qyzmettik kabinetinde qolǵa túsken.
Olar azyq-túlik ónimderin satyp alý jáne jetkizý kezinde jasalǵan bolýy múmkin sybailas jemqorlyq qylmystaryna kúdiktelip otyr.
BÁSE derekkózderiniń málimetinshe, Shurmanov Ishki ister ministri Erjan Sádenov qyzmetine kiriskennen keiin kásiporyn basshysy bolyp taǵaiyndalǵan. Osydan keiin qylmystyq-atqarý júiesi mekemelerin azyq-túlikpen qamtamasyz etý tártibi ózgergen.
Basylymnyń jazýynsha, buǵan deiin azyq-túlik jetkizýmen segiz jetkizýshi ainalyssa, keiin bul jumys bir kompaniianyń qolyna shoǵyrlanǵan. Derekkózder mundai ózgeristen keiin túrmelerdegi azyq-túlikpen qamtý máseleleri kúrdelene túskenin aitqan.
Buǵan deiin de Qazaqstandaǵy koloniialarda sottalǵandardy tamaqpen qamtamasyz etýge qatysty problemalar bolǵany habarlanǵan.
Alaida ustalǵany týraly aqparat ázirge resmi túrde rastalǵan joq. BÁSE basylymy oqiǵanyń mán-jaiyn anyqtap jatqanyn málimdedi.
