Pavlodar oblystyq máslihatynyń depýtaty Sabiden Mantyqov pen oblystyq densaýlyq saqtaý basqarmasynyń basshysy Iran Shametekov jinalys barysynda sózge kelip qaldy, dep habarlaidy Dalanews.kz.
Jiynda depýtat aýrýhananyń jeldetý júiesindegi aqaýǵa nazar aýdardy.
"13 milliard teńge bólindi, biraq jeldetý júiesi jumys istemeidi. Dárigerler qalypty jaǵdaida ota jasai almai otyr. Buǵan ne aitasyz?", - dep surady depýtat.
Al Shametekov bul suraqqa ashýlana jaýap berdi.
"Aktke áli bas dáriger qol qoiǵan joq. Operatsiialyq aimaq jumys istep tur, biraq dárigerler jeldetý júiesine tolyq kire almaidy. Bas dárigerdiń aitýynsha, bári rettelgen. Biz tiisti shara qoldanyp jatyrmyz. Biraq men tergeýde otyrǵan joqpyn ǵoi! Eger sóilessek, obektivti túrde sóileseiik", - dedi ol ashýly kúide.
Resmi tekseris
Osydan keiin depýtat Mantyqov máseleni naqtylap, óziniń depýtattyq saýaly negizinde tekserý júrgizilgenin aitty.
“Depýtattyq saýalyma sáikes, Pavlodar oblysynyń memlekettik sáýlet-qurylys baqylaý basqarmasy birinshi qalalyq aýrýhananyń operatsiialyq bólmelerin tekserdi. Nátijesinde jeldetý júiesiniń durys jumys istemeitini anyqtaldy. Merdiger ákimshilik jaýapkershilikke tartyldy. Sonymen birge basqarma basshysy Shamitekov depýtattyq korpýs aldynda shyndyqqa sai kelmeitin aqparat usynǵany belgili boldy. Osyǵan bailanysty tiisti memlekettik organdarǵa ótinish joldandy”, — dedi halyq qalaýlysy.
Hatta ne jazylǵan?
Hatta basqarma basshysynyń mindetin atqarýshy Marat Imanhanov Pavlodar qalasyndaǵy №1 qalalyq aýrýhananyń eki qabatty (D jáne G) jáne "A" blogyn qaita jańartý jumystaryna bailanysty depýtat saýalyna egjei-tegjeili túsinikteme bergen.
“Ótinish negizinde “BCN Group” JShS merdigerlik uiymyna qatysty qurylys-montajdaý jumystary boiynsha basqarma jospardan tys tekserý júrgizdi. Atalǵan tekserý QR Bas prokýratýrasynyń quqyqtyq statistika jáne arnaiy esepke alý komitetiniń Pavlodar oblysy boiynsha departamentinde tirkelgen”, – delingen resmi hatta.
Tekserý qorytyndysy boiynsha, sáýlet, qala qurylysy jáne qurylys qyzmeti salasyndaǵy zań buzýshylyqtar anyqtalǵan. Osyǵan bailanysty nysannyń merdigerine QR Ákimshilik quqyq buzýshylyq týraly kodekstiń 312-babynyń 2-bóligi boiynsha hattama toltyrylyp, 1400 ailyq eseptik kórsetkish (shamamen 5,1 mln teńge) kóleminde aiyppul salyndy.
Sonymen qatar merdiger uiymǵa 28 qarasha 2025 jylǵa deiin anyqtalǵan kemshilikterdi joiý jáne jeldetý men konditsionerleý júiesiniń tehnikalyq jai-kúiine tekserý júrgizýtýraly nusqama berilgen.
Basqarmanyń málimetinshe, atalǵan tekserý nátijeleri depýtat kótergen máseleniń oryndy ekenin kórsetken.
