پاۆلودار وبلىستىق ءماسليحاتىنىڭ دەپۋتاتى سابيدەن مانتىقوۆ پەن وبلىستىق دەنساۋلىق ساقتاۋ باسقارماسىنىڭ باسشىسى يران شامەتەكوۆ جينالىس بارىسىندا سوزگە كەلىپ قالدى، دەپ حابارلايدى Dalanews.kz.
جيىندا دەپۋتات اۋرۋحانانىڭ جەلدەتۋ جۇيەسىندەگى اقاۋعا نازار اۋداردى.
"13 ميلليارد تەڭگە ءبولىندى، ءبىراق جەلدەتۋ جۇيەسى جۇمىس ىستەمەيدى. دارىگەرلەر قالىپتى جاعدايدا وتا جاساي الماي وتىر. بۇعان نە ايتاسىز؟"، - دەپ سۇرادى دەپۋتات.
ال شامەتەكوۆ بۇل سۇراققا اشۋلانا جاۋاپ بەردى.
"اكتكە ءالى باس دارىگەر قول قويعان جوق. وپەراسيالىق ايماق جۇمىس ىستەپ تۇر، ءبىراق دارىگەرلەر جەلدەتۋ جۇيەسىنە تولىق كىرە المايدى. باس دارىگەردىڭ ايتۋىنشا، ءبارى رەتتەلگەن. ءبىز ءتيىستى شارا قولدانىپ جاتىرمىز. ءبىراق مەن تەرگەۋدە وتىرعان جوقپىن عوي! ەگەر سويلەسسەك، وبەكتيۆتى تۇردە سويلەسەيىك"، - دەدى ول اشۋلى كۇيدە.
رەسمي تەكسەرىس
وسىدان كەيىن دەپۋتات مانتىقوۆ ماسەلەنى ناقتىلاپ، ءوزىنىڭ دەپۋتاتتىق ساۋالى نەگىزىندە تەكسەرۋ جۇرگىزىلگەنىن ايتتى.
“دەپۋتاتتىق ساۋالىما سايكەس، پاۆلودار وبلىسىنىڭ مەملەكەتتىك ساۋلەت-قۇرىلىس باقىلاۋ باسقارماسى ءبىرىنشى قالالىق اۋرۋحانانىڭ وپەراسيالىق بولمەلەرىن تەكسەردى. ناتيجەسىندە جەلدەتۋ جۇيەسىنىڭ دۇرىس جۇمىس ىستەمەيتىنى انىقتالدى. مەردىگەر اكىمشىلىك جاۋاپكەرشىلىككە تارتىلدى. سونىمەن بىرگە باسقارما باسشىسى شاميتەكوۆ دەپۋتاتتىق كورپۋس الدىندا شىندىققا ساي كەلمەيتىن اقپارات ۇسىنعانى بەلگىلى بولدى. وسىعان بايلانىستى ءتيىستى مەملەكەتتىك ورگاندارعا ءوتىنىش جولداندى”، — دەدى حالىق قالاۋلىسى.
حاتتا نە جازىلعان؟
حاتتا باسقارما باسشىسىنىڭ مىندەتىن اتقارۋشى مارات يمانحانوۆ پاۆلودار قالاسىنداعى №1 قالالىق اۋرۋحانانىڭ ەكى قاباتتى (د جانە گ) جانە "ا" بلوگىن قايتا جاڭارتۋ جۇمىستارىنا بايلانىستى دەپۋتات ساۋالىنا ەگجەي-تەگجەيلى تۇسىنىكتەمە بەرگەن.
“ءوتىنىش نەگىزىندە “BCN Group” ج ش س مەردىگەرلىك ۇيىمىنا قاتىستى قۇرىلىس-مونتاجداۋ جۇمىستارى بويىنشا باسقارما جوسپاردان تىس تەكسەرۋ جۇرگىزدى. اتالعان تەكسەرۋ ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ پاۆلودار وبلىسى بويىنشا دەپارتامەنتىندە تىركەلگەن”، – دەلىنگەن رەسمي حاتتا.
تەكسەرۋ قورىتىندىسى بويىنشا، ساۋلەت، قالا قۇرىلىسى جانە قۇرىلىس قىزمەتى سالاسىنداعى زاڭ بۇزۋشىلىقتار انىقتالعان. وسىعان بايلانىستى نىساننىڭ مەردىگەرىنە ق ر اكىمشىلىك قۇقىق بۇزۋشىلىق تۋرالى كودەكستىڭ 312-بابىنىڭ 2-بولىگى بويىنشا حاتتاما تولتىرىلىپ، 1400 ايلىق ەسەپتىك كورسەتكىش (شامامەن 5،1 ملن تەڭگە) كولەمىندە ايىپپۇل سالىندى.
سونىمەن قاتار مەردىگەر ۇيىمعا 28 قاراشا 2025 جىلعا دەيىن انىقتالعان كەمشىلىكتەردى جويۋ جانە جەلدەتۋ مەن كونديسيونەرلەۋ جۇيەسىنىڭ تەحنيكالىق جاي-كۇيىنە تەكسەرۋ جۇرگىزۋتۋرالى نۇسقاما بەرىلگەن.
باسقارمانىڭ مالىمەتىنشە، اتالعان تەكسەرۋ ناتيجەلەرى دەپۋتات كوتەرگەن ماسەلەنىڭ ورىندى ەكەنىن كورسەتكەن.
