22 qazan kúni Samarqand qalasynda ótken Qazaqstan men Ózbekstan úkimetteriniń birlesken óńiraralyq forýmynda Mańǵystaý oblysynyń ákimi Nurdáýlet Qilybai Mańǵystaý oblysy men Ózbekstannyń ekonomikalyq, saýda-sattyq bailanystaryn keńeitýge qatysty birqatar usynys bildirdi, dep habarlaidy Dalanews.kz.
Búginde Mańǵystaý men Ózbekstandy bailanystyratyn avtojol salynyp jatyr. Qazaqstan aýmaǵynda "Tájen" keden beketine deiin jol tóselýde. Al kúni keshe Qaraqalpaqstan ortalyǵynan el shekarasyna deiin jańa avtojol paidalanýǵa berildi. Bul aldaǵy ýaqytta Mańǵystaý oblysy men Ózbekstan arasyndaǵy taýar ainalymynyń artýyna múmkindik beredi.
Nurdáýlet Qilybaidyń aitýynsha, Mańǵystaý óńiriniń kóterme bazarlaryna azyq-túlik ónimderiniń, kókónisterdiń, jemisterdiń basym bóligi Ózbekstan Respýblikasynyń Buhara, Samarqand, Nókis, Syrdariia egistikterinen ákelinedi. "Tájen" keden beketi arqyly kúnine 250-300-ge jýyq júk kóligi ótedi, onyń ishinde orta eseppen Mańǵystaý oblysyna 25-30 júk kóligi jóneltiledi. Bul shamamen 11 myń tonna taýar.
"Bizdiń delegatsiia quramynda eldegi eń iri kóterme taratý ortalyqtarynyń biri - "Aqtaý ORTs" JShS-niń quryltaishysy bar. Qazirgi ýaqytta olar qajetti saýda alańyn usynýǵa tolyq daiyn jáne ózbekstandyq kásipkerler tarapynan naqty qadamdar kútedi. Biz ol jerde "Ózbekstanda jasalǵan" saýda alańyn ashyp, aýyl sharýashylyǵy jármeńkelerin uiymdastyrýǵa daiynbyz",- dedi Nurdáýlet Qilybai.
Sondai-aq, óńiraralyq forýmda Mańǵystaý oblysynyń ákimi eki el arasyndaǵy saýda-sattyq bailanystaryn odan ári arttyrý maqsatynda shekaralas aimaqta "Qorǵas" saýda kesheni úlgisinde arnaiy bajsyz saýda aimaǵyn qurýdy usyndy. Saýda-ekonomikalyq aimaqtyń ashylýy Mańǵystaý oblysy men Ózbekstan Respýblikasy arasyndaǵy taýar ainalymyn 4 esege arttyrýǵa múmkindik beredi.
Sonymen qatar jiynda týrizm, aýylsharýashylyǵy salasyndaǵy yntymaqtastyq týraly da sóz boldy. Máselen, Ózbekstan Respýblikasynyń týroperatorlary úshin Mańǵystaý oblysyndaǵy tarihi-mádeni jáne týristik oryndardy qamtityn daiyn týrpaketter ázirlenip, 2025 jyly jumysyn bastaýǵa daiyn ekendigi de aityldy.
"Mańǵystaý oblysyn damytýdaǵy basym baǵyttardyń biri – aýyl sharýashylyǵy bolǵandyqtan óńirde jylyjai sharýashylyǵyn birlesip damytýdy usynamyz. Biz sý, tyńaitqyshtarǵa ketken shyǵyndardyń bir bóligin sýbsidiialaýǵa, qajetti infraqurylymmen qamtamasyz etýge, tómen paiyzdyq mólsherlememen jeńildetilgen nesieler men qolaily jer telimderin berýge daiynbyz" ,-dep atap ótti Nurdáýlet Qilybai.
Forýmda aimaq basshysy Ózbekstanmen, sonyń ishinde Qaraqalpaqstan Respýblikasymen ekijaqty yntymaqtastyqty nyǵaitýǵa, ekonomikalyq bailanystardy keńeitýge baǵyttalǵan barlyq bastamalardy qoldaýǵa daiyn ekenin atap ótti.
Jiyn sońynda Mańǵystaý oblysy ákimdigi men Qaraqalpaqstan Respýblikasy arasynda, Beineý jáne Hodjeili aýdandary arasynda yntymaqtastyq týraly kelisimge qol qoiyldy. Taǵy bir sátti kelisim Ózbekstannyń "Nukus dilisha" JShS men Beineý ákimdigi jáne "Aqtaý ORTs" JShS-niń arasynda jasaldy. Ózbekstandyq kásipkerler Aqtaý qalasy men Beineý aýdanynda iri saýda alańdaryn salatyn boldy.
Aita keteiik, Mańǵystaý oblysynda Ózbekstannyń qatysýymen 140 kásiporyn tirkelgen. Eki óńirdiń syrtqy saýda ainalymy 2023 jyldyń qorytyndysy boiynsha 13,2 million AQSh dollaryn qurady.
Jalpy taýar ainalymynan Ózbekstan Respýblikasynan keletin importtyń úlesi shamamen 25% qurap otyr.
