Jambyl oblysynda UQKD qyzmetkerleri Baızaq aýdandyq polısıa bóliminiń aǵa jedel ýákili, maıor Jasulan Elýbaıdy ustady, dep habarlaıdy Dalanews.kz.

Oǵan mal urlyǵy jónindegi qylmystyq isti toqtatyp beremin dep 700 myń teńge alǵan degen kúdik keltirilip otyr.

HALYQSTAN Telegram-arnasy taratqan derekke qaraǵanda, sóz Talas aýdanynyń turǵynyna qatysty esekterdi urlaý isi týraly bolyp otyr. Jábirlenýshi janýarlardyń Baızaq aýdanynda urlanǵanyn málimdegen.

Alǵashynda qylmystyq isti toqtatý úshin 1,5 mln teńge suralǵany, biraq keıin taraptar 700 myń teńgege keliskeni habarlandy. Polıseıdi aqshany alý kezinde ustap, qolǵa túsirgen.

Eske salaıyq, bıyl aqpanda Jambyl oblysynda Baızaq aýdandyq polısıa bóliminiń bastyǵynyń orynbasary da ustalǵan edi. Oǵan 10,7 mln teńgeni urlaý deregin ádeıi jasyryp qaldy degen aıyp taǵylǵan.