Úsenbi Bazarqulovtyń týystary ony qamaýda ustap otyrǵan №77 mekemesi qyzmetkerlerinen qysym, qaýip-qater jáne quqyqtarynyń buzylýyna shaǵymdanyp otyr. Otbasy prokýratýraǵa, áskeri prokýratýraǵa, Qylmystyq-atqarý júiesi komitetine (QAJK), sondai-aq Memleket basshysyna kómek surap júgingen, dep habarlaidy Dalanews.kz Lada.kz-ke silteme jasap.
Sottalǵan áskeri qyzmetshiniń ákesi Ábdiǵapar Bazarqulov videoúndeý jariialap, ulyna uryp-soǵý qaýpi tónip, qorlaý men psihologiialyq qysym kórsetilip jatqanyn málimdedi. Onyń aitýynsha, mekeme qyzmetkerleri men basqa da sottalǵandar Úsenbiden qosymsha is boiynsha moiyndaý talap etip, kúsh qoldanamyn dep qorqytyp júr. Sondai-aq ol sottalǵannyń anasy - qoǵamdyq qorǵaýshy - Batys garnizonynyń áskeri politsiiasy qyzmetkerlerinen qysym kórgenin, tipti eki apta boiy balasyna jolyǵa almaǵanyn aitty.
Áskeri qyzmetshiniń áieli Nuráli Bazarqulova da osyndai málimdeme jasap, úsh aidan beri kúieýimen bailanysa almai júrgenin, ony ádeii oqshaýlap otyrǵanyna kúdiktenetinin jetkizdi. Onyń sózinshe, kúieýi meditsinalyq kómektiń joqtyǵyna, ustaý jaǵdaiynyń nasharlyǵyna jáne zańmen ruqsat etilgen shaǵymdardy qadaǵalaý organdaryna jiberýge jasalǵan kedergilerge shaǵymdanǵan. Áieldiń aitýynsha, prokýratýraǵa, áskeri prokýratýraǵa jáne QAJK-ge jazylǵan ótinishter ázirge nátije bermegen.
Otbasynyń sózinshe, 5 qarasha kúni Úsenbi Bazarqulov uryp-soǵýǵa, qorlaýǵa, tipti beinebaqylaý aimaǵynan tys jerde jynystyq sipattaǵy qysym kórsetýge deiingi qaýip-qaterge tap bolǵan. Onyń paiymdaýynsha, bul is-áreketke rejimdik qyzmettiń jekelegen qyzmetkerleri qatysy bar, al mekeme basshylyǵy bolǵan jaǵdaidy jasyrýǵa tyrysqan. Nurálidiń aitýynsha, kúieýin jazalaý maqsatynda májbúrlep shashyn qyryp, saqalyn alyp tastaǵan.
Ákesi ulynyń «KamAZ» júkkóliginiń bólshekterin satýǵa árekettendi degen is boiynsha úsh jylǵa bas bostandyǵynan aiyrylǵanyn eske saldy. Týystary aiyptaýdy negizsiz dep sanaidy jáne memleketke eshqandai zalal kelmegenin alǵa tartady. Ábdiǵapar Bazarqulovtyń aitýynsha, otbasynyń qolynda birge otyrǵandardyń jazbasha málimdemeleri men notarialdy rastalǵan dálelder bar, olardy tergeý organdaryna tapsyrýǵa daiyn.
Áskeri qyzmetshiniń jaqyndary Prezident Qasym-Jomart Toqaevqa úndeý joldap, Úsenbi Bazarqulovtyń qaýipsizdigin qamtamasyz etýdi suraǵan.
Mańǵystaý oblysy boiynsha QAJ departamenti otbasy kótergen máseleler boiynsha qyzmettik tekseris bastalǵanyn habarlady.
