ۇسەنبى بازارقۇلوۆتىڭ تۋىستارى ونى قاماۋدا ۇستاپ وتىرعان №77 مەكەمەسى قىزمەتكەرلەرىنەن قىسىم، قاۋىپ-قاتەر جانە قۇقىقتارىنىڭ بۇزىلۋىنا شاعىمدانىپ وتىر. وتباسى پروكۋراتۋراعا، اسكەري پروكۋراتۋراعا، قىلمىستىق-اتقارۋ جۇيەسى كوميتەتىنە (قاجك)، سونداي-اق مەملەكەت باسشىسىنا كومەك سۇراپ جۇگىنگەن، دەپ حابارلايدى Dalanews.kz Lada.kz-كە سىلتەمە جاساپ.
سوتتالعان اسكەري قىزمەتشىنىڭ اكەسى ءابدىعاپار بازارقۇلوۆ ۆيدەوۇندەۋ جاريالاپ، ۇلىنا ۇرىپ-سوعۋ ءقاۋپى ءتونىپ، قورلاۋ مەن پسيحولوگيالىق قىسىم كورسەتىلىپ جاتقانىن مالىمدەدى. ونىڭ ايتۋىنشا، مەكەمە قىزمەتكەرلەرى مەن باسقا دا سوتتالعاندار ۇسەنبىدەن قوسىمشا ءىس بويىنشا مويىنداۋ تالاپ ەتىپ، كۇش قولدانامىن دەپ قورقىتىپ ءجۇر. سونداي-اق ول سوتتالعاننىڭ اناسى - قوعامدىق قورعاۋشى - باتىس گارنيزونىنىڭ اسكەري پوليسياسى قىزمەتكەرلەرىنەن قىسىم كورگەنىن، ءتىپتى ەكى اپتا بويى بالاسىنا جولىعا الماعانىن ايتتى.
اسكەري قىزمەتشىنىڭ ايەلى ءنۇرالى بازارقۇلوۆا دا وسىنداي مالىمدەمە جاساپ، ءۇش ايدان بەرى كۇيەۋىمەن بايلانىسا الماي جۇرگەنىن، ونى ادەيى وقشاۋلاپ وتىرعانىنا كۇدىكتەنەتىنىن جەتكىزدى. ونىڭ سوزىنشە، كۇيەۋى مەديسينالىق كومەكتىڭ جوقتىعىنا، ۇستاۋ جاعدايىنىڭ ناشارلىعىنا جانە زاڭمەن رۇقسات ەتىلگەن شاعىمداردى قاداعالاۋ ورگاندارىنا جىبەرۋگە جاسالعان كەدەرگىلەرگە شاعىمدانعان. ايەلدىڭ ايتۋىنشا، پروكۋراتۋراعا، اسكەري پروكۋراتۋراعا جانە قاجك-گە جازىلعان وتىنىشتەر ازىرگە ناتيجە بەرمەگەن.
وتباسىنىڭ سوزىنشە، 5 قاراشا كۇنى ۇسەنبى بازارقۇلوۆ ۇرىپ-سوعۋعا، قورلاۋعا، ءتىپتى بەينەباقىلاۋ ايماعىنان تىس جەردە جىنىستىق سيپاتتاعى قىسىم كورسەتۋگە دەيىنگى قاۋىپ-قاتەرگە تاپ بولعان. ونىڭ پايىمداۋىنشا، بۇل ىس-ارەكەتكە رەجيمدىك قىزمەتتىڭ جەكەلەگەن قىزمەتكەرلەرى قاتىسى بار، ال مەكەمە باسشىلىعى بولعان جاعدايدى جاسىرۋعا تىرىسقان. ءنۇرالىدىڭ ايتۋىنشا، كۇيەۋىن جازالاۋ ماقساتىندا ماجبۇرلەپ شاشىن قىرىپ، ساقالىن الىپ تاستاعان.
اكەسى ۇلىنىڭ «كاماز» جۇككولىگىنىڭ بولشەكتەرىن ساتۋعا ارەكەتتەندى دەگەن ءىس بويىنشا ءۇش جىلعا باس بوستاندىعىنان ايىرىلعانىن ەسكە سالدى. تۋىستارى ايىپتاۋدى نەگىزسىز دەپ سانايدى جانە مەملەكەتكە ەشقانداي زالال كەلمەگەنىن العا تارتادى. ءابدىعاپار بازارقۇلوۆتىڭ ايتۋىنشا، وتباسىنىڭ قولىندا بىرگە وتىرعانداردىڭ جازباشا مالىمدەمەلەرى مەن نوتاريالدى راستالعان دالەلدەر بار، ولاردى تەرگەۋ ورگاندارىنا تاپسىرۋعا دايىن.
اسكەري قىزمەتشىنىڭ جاقىندارى پرەزيدەنت قاسىم-جومارت توقايەۆقا ۇندەۋ جولداپ، ۇسەنبى بازارقۇلوۆتىڭ قاۋىپسىزدىگىن قامتاماسىز ەتۋدى سۇراعان.
ماڭعىستاۋ وبلىسى بويىنشا قاج دەپارتامەنتى وتباسى كوتەرگەن ماسەلەلەر بويىنشا قىزمەتتىك تەكسەرىس باستالعانىن حابارلادى.
