Úsh birdei mobildi bailanys operatory baǵany kótermekshi. Tarifterdiń ózgerýi biylǵy 25 jeltoqsannan bastap júzege asady, dep habarlaidy Dalanews.kz.
Altel, Beeline jáne Tele2 uialy bailanys operatorlary internet pen bailanys qyzmetteriniń baǵasy qymbattaitynyn habarlady.
Tele2 men Altel-de abonenttik tólem men tarifterdegi qyzmet kólemi 25 jeltoqsannan bastap ózgeredi. Kompaniialar muny jańa Salyq kodeksiniń engizilýimen bailanystyryp otyr.
"Kompaniia tariftik josparlardyń baǵalaryn qaita qaraidy. Bul – májbúrli qadam. Sheshim jelilerdi damytý jáne jańǵyrtý shyǵyndarynyń artýyna, olardy tehnikalyq qyzmet kórsetýdiń qymbattaýyna, sondai-aq salyq zańnamasyndaǵy ózgeristerge bailanysty qabyldandy. Abonenttik tólemniń ózgerýi servisterdiń turaqtylyǵyn saqtap, odan da sapaly qyzmet kórsetýge múmkindik beredi", - delingen habarlamada.
Tarifterdiń qalai ózgeretini týraly naqty aqparat abonentterge SMS arqyly jiberiledi.
Beeline de 2026 jylǵy 1 qańtardan bastap mobildi jáne keńselik internet qyzmetteriniń baǵasy ózgeretinin málimdedi. Qunnyń ósýi jónindegi tolyq aqparat kompaniia saitynda jariialanatyn bolady.
Sonymen qatar, tariftik josparlardyń ózi de qymbattaidy. Biraq ázirge mobildi operator naqty derekterdi usynǵan joq.
"QQS mólsherlemesiniń ózgerýi bailanys, internet jáne qosymsha servisterdiń qunyna áser etedi. Osyǵan bailanysty tarif josparlary boiynsha abonenttik tólem qaita esepteledi. Biz paidalanýshylardy jańartylǵan baǵalar týraly ózgerister kúshine engenge deiin keminde 30 kún buryn aldyn ala habarlaimyz", - dep málimdedi kompaniia.
