Aqtóbede Gonkong tumaýynyń 97 jaǵdaıy tirkeldi. Naýqastardyń ishinde eki júkti áıel jáne 14 jasqa tolmaǵan 72 balanyń bar ekeni belgili boldy, dep habarlaıdy Dalanews.kz
Aqtóbe oblysynyń medısınalyq mekemelerinde JRVI dıagnozy qoıylǵan 100-den astam adam emdelýdi jalǵastyrýda. Solardyń 75-i — balalar. Bul týraly oblystyq densaýlyq saqtaý basqarmasynyń baspasóz qyzmeti málimdedi.
Aqtóbe oblysynyń sanıtarlyq-epıdemıologıalyq baqylaý departamentiniń basshysy Raıhan Koıshanovanyń habarlaýynsha, A tıpti tumaý (H3N2 shtammy) 97 adamnan anyqtalǵan. Olardyń 72-si 14 jasqa deıingi balalar bolsa, eki jaǵdaı — júkti áıelderde tirkelgen.
Onyń aıtýynsha, Aqtóbedegi jalpy bilim beretin mektepterde maska taǵý rejımi engizilgen joq, qosymsha shekteý sharalary da qarastyrylmaǵan.
— Oqý uıymdary qalypty, dástúrli formatta jumys istep jatyr. Epıdemıologıalyq jaǵdaı turaqty kúıinde saqtalýda, — dedi Raıhan Qoıshanova.
