Memleket basshysy World Boxing prezıdenti Gennadıı Golovkındi qabyldady, dep habarlaıdy Dalanews.kz.
Qasym-Jomart Toqaev Gennadıı Golovkındi World Boxing halyqaralyq federasıasynyń prezıdenti bolyp saılanýymen quttyqtady. Bul sheshimdi dańqty sportshynyń álemdik boksty damytýǵa qosqan úlesiniń, kásibıligi men minsiz abyroı-bedeliniń moıyndalǵany dep baǵalady.
"Siz álemdik sporttyń damýyna zor úles qostyńyz. Qazaq boks mektebiniń baı dástúrin laıyqty deńgeıde tanytyp, dúnıe júziniń elimizdi boks derjavasy retinde moıyndaýyna yqpal ettińiz. Ómir jolyńyz kóptegen jarqyn jeńiske toly. Oǵan kúsh-qýat, rýh, tabandylyq, ishki tártip sekildi qasıetterińiz arqyly jettińiz. Bul elimizde ǵana emes, shet memleketterdegi mıllıondaǵan jastyń jigerin janıdy. Esimińiz álemdik boks tarıhyna altyn árippen jazylǵanyna esh kúmán joq", – dedi Prezıdent.
Memleket basshysy tanymal sportshynyń Ulttyq olımpıada komıtetindegi qyzmetine joǵary baǵa berdi.
"Sizdiń basqarý salasyndaǵy jetistikterińizdi aıryqsha atap ótkim keledi. Sporttaǵy eńbegińizdi eskere otyryp, Sizdi Ulttyq olımpıada komıteti prezıdenttigine úmitker retinde usyndym. Ulttyq sport federasıalarynyń barlyǵymen baılanys ornatyp, az ýaqytta kóp is tyndyrǵanyńyz úshin rızashylyǵymyzdy bildiremiz. Halyqaralyq Olımpıada komıtetimen yntymaqtastyqty jolǵa qoıdyńyz", – dedi Memleket basshysy.
Qasym-Jomart Toqaev Gennadıı Golovkınge World Boxing halyqaralyq federasıasynyń prezıdenti retinde kóptegen máseleniń sheshimin tabýy qajet ekenin aıtty.
"Búginde sporttyq mansabyńyzdaǵy jańa kezeńge aıaq bastyńyz. World Boxing federasıasynyń prezıdenti bolyp saılandyńyz. Jumys endi ǵana bastaldy. Aldyńyzda atqaratyn qyrýar sharýa tur. Sondaı-aq Sizdiń jahandyq deńgeıdegi sporttyq qurylymdy basqaryp otyrǵan alǵashqy qazaqstandyq ekenińizdi aıta ketý kerek. Kásibı biliktiligińiz uıymdy jańa beleske kóterip, boks kókjıegin keńeıtetinine senimdimin", – dedi Prezıdent.
Memleket basshysy otandyq sportty damytýǵa sińirgen eleýli eńbegi úshin Gennadıı Golovkındi İ dárejeli «Barys» ordenimen marapattady.
Gennadıı Golovkın eńbegin joǵary baǵalaǵany, senim artyp, qoldaý kórsetkeni úshin Prezıdent Qasym-Jomart Toqaevqa alǵys aıtty. Sondaı-aq boksty odan ári damytýǵa, osy sport túriniń elimizdegi jáne halyqaralyq deńgeıdegi bedelin nyǵaıtýǵa daıyn ekenin jetkizdi.
