Áleýmettik jelide “Shymbulaq” taý-shańǵy kýrortyndaǵy baǵanyń shekten tys qymbattaýyna qatysty shaǵymdar kóbeiip keledi. Paidalanýshylar biylǵy maýsymdyq abonement pen kýrort aýmaǵyndaǵy kommertsiialyq nysandardyń qyzmet kórsetý quny eselep óskenin aityp, dabyl qaǵýda, dep habarlaidy Dalanews.kz.
Abonement baǵasy
Jelide taraǵan aqparatqa sáikes, biyl maýsymdyq abonement 550 myń teńgege jetken. Al ótken maýsymda onyń quny shamamen 360 myń teńge bolǵan.
Sondai-aq shaǵymdar tek abonementpen shektelmeidi. Kýrort aýmaǵyndaǵy qoǵamdyq tamaqtaný oryndarynyń baǵasy da kópshiliktiń ashýyn týǵyzdy. Máselen, jelide jariialanǵan videolardyń birinde bir staqan shai 5 myń teńgeden satylyp jatqany kórsetilgen.
Buǵan deiin demalýshylardyń biri osy máselege qatysty óz shaǵymyn jetkizgen edi.
“Shymbulaqta bir qyzyq tendentsiia bar. Neǵurlym joǵary kóterilseń, soǵurlym tamaq qymbattai beredi. Biz qatty tońyp qaldyq, sondyqtan shai isheiik dedik. Ádette shai ishpeimin, biraq myna kishkentai staqan shaiǵa 5 myń teńge tóledim”, – deidi videodaǵy arý.
Bul beine kópshiliktiń talqysyna túsip, áleýmettik jelilerde syn-pikirler kóbeidi.
Shymbulaq ákimshiligi ne deidi?
Daýly máselege qatysty Shymbulaq ákimshiligi resmi jaýap berdi. Olardyń aitýynsha, jańa maýsymǵa arnalǵan baǵa tizimi áli naqty bekitilmegen.
“6 jeltoqsanda maýsymnyń resmi ashylýy josparlanǵan. Sol kúnge qarai jańa maýsymǵa arnalǵan baǵa tizimi belgili bolady”, — dep jaýap berdi.
Alaida abonement baǵasynyń nege óskeni jáne kommertsiialyq núktelerdegi baǵa saiasaty qalai retteletini týraly naqty túsinikteme berilgen joq.
Resmi saýal joldandy
Dalanews.kz redaktsiiasy Shymbulaqtaǵy qyzmet qunynyń qymbattaýyna bailanysty Almaty qalasy Týrizm basqarmasyna resmi saýal joldady. Atalǵan mekemden ázirge jaýap kelgen joq.
Shymbulaqqa kelýshiler sany
Aita keteiik, byltyr "Shymbulaq" taý-shańǵy kýrorty 1,5 mln qonaq qabyldady. Bul – otandyq jáne sheteldik týristerdiń jalpy sany. Taý-shańǵy kýrortyna jazǵy jáne qysqy maýsymda shamamen birdei týrister kelgen. Iaǵni, jazǵy maýsymda – 700 myń, qysqy kezeńde 800 myń adam "Shymbulaqqa" barǵan. Týrister sanynyń jyldyq ósimi 24 paiyzdy qurady.
Kýrort búginde el turǵyndary men sheteldik meimandar úshin eń tanymal demalys oryndarynyń birine ainalyp keledi.
Degenmen kelýshiler sanynyń artýy qýantqanymen, baǵanyń kúrt ósýi qoǵamda alańdaýshylyq týdyryp otyr.
