الەۋمەتتىك جەلىدە “شىمبۇلاق” تاۋ-شاڭعى كۋرورتىنداعى  باعانىڭ شەكتەن تىس قىمباتتاۋىنا قاتىستى شاعىمدار كوبەيىپ كەلەدى. پايدالانۋشىلار بيىلعى ماۋسىمدىق ابونەمەنت پەن كۋرورت اۋماعىنداعى كوممەرسيالىق نىسانداردىڭ قىزمەت كورسەتۋ قۇنى ەسەلەپ وسكەنىن ايتىپ، دابىل قاعۋدا، دەپ حابارلايدى Dalanews.kz.

ابونەمەنت باعاسى

جەلىدە تاراعان اقپاراتقا سايكەس، بيىل ماۋسىمدىق ابونەمەنت 550 مىڭ تەڭگەگە جەتكەن. ال وتكەن ماۋسىمدا ونىڭ قۇنى شامامەن 360 مىڭ تەڭگە بولعان. 

سونداي-اق شاعىمدار تەك ابونەمەنتپەن شەكتەلمەيدى. كۋرورت اۋماعىنداعى قوعامدىق تاماقتانۋ ورىندارىنىڭ باعاسى دا كوپشىلىكتىڭ اشۋىن تۋعىزدى. ماسەلەن، جەلىدە جاريالانعان ۆيدەولاردىڭ بىرىندە ءبىر ستاقان شاي 5 مىڭ تەڭگەدەن ساتىلىپ جاتقانى كورسەتىلگەن.

بۇعان دەيىن دەمالۋشىلاردىڭ ءبىرى وسى ماسەلەگە قاتىستى ءوز شاعىمىن جەتكىزگەن ەدى.

“شىمبۇلاقتا ءبىر قىزىق تەندەنسيا بار. نەعۇرلىم جوعارى كوتەرىلسەڭ، سوعۇرلىم تاماق قىمباتتاي بەرەدى. ءبىز قاتتى توڭىپ قالدىق، سوندىقتان شاي ىشەيىك دەدىك. ادەتتە شاي ىشپەيمىن، ءبىراق مىنا كىشكەنتاي ستاقان شايعا 5 مىڭ تەڭگە تولەدىم”، – دەيدى ۆيدەوداعى ارۋ.

بۇل بەينە كوپشىلىكتىڭ تالقىسىنا ءتۇسىپ، الەۋمەتتىك جەلىلەردە سىن-پىكىرلەر كوبەيدى. 

شىمبۇلاق اكىمشىلىگى نە دەيدى؟

داۋلى ماسەلەگە قاتىستى شىمبۇلاق اكىمشىلىگى رەسمي جاۋاپ بەردى. ولاردىڭ ايتۋىنشا، جاڭا ماۋسىمعا ارنالعان باعا ءتىزىمى ءالى ناقتى بەكىتىلمەگەن.

“6 جەلتوقساندا ماۋسىمنىڭ رەسمي اشىلۋى جوسپارلانعان. سول كۇنگە قاراي جاڭا ماۋسىمعا ارنالعان باعا ءتىزىمى بەلگىلى بولادى”، — دەپ جاۋاپ بەردى.

الايدا ابونەمەنت باعاسىنىڭ نەگە وسكەنى جانە كوممەرسيالىق نۇكتەلەردەگى باعا ساياساتى قالاي رەتتەلەتىنى تۋرالى ناقتى تۇسىنىكتەمە بەرىلگەن جوق.

رەسمي ساۋال جولداندى

Dalanews.kz رەداكسياسى شىمبۇلاقتاعى قىزمەت قۇنىنىڭ قىمباتتاۋىنا بايلانىستى الماتى قالاسى تۋريزم باسقارماسىنا رەسمي ساۋال جولدادى. اتالعان مەكەمدەن ازىرگە جاۋاپ كەلگەن جوق.

شىمبۇلاققا كەلۋشىلەر سانى

ايتا كەتەيىك، بىلتىر "شىمبۇلاق" تاۋ-شاڭعى كۋرورتى 1،5 ملن قوناق قابىلدادى. بۇل – وتاندىق جانە شەتەلدىك تۋريستەردىڭ جالپى سانى. تاۋ-شاڭعى كۋرورتىنا جازعى جانە قىسقى ماۋسىمدا شامامەن بىردەي تۋريستەر كەلگەن. ياعني، جازعى ماۋسىمدا – 700 مىڭ، قىسقى كەزەڭدە 800 مىڭ ادام "شىمبۇلاققا" بارعان. تۋريستەر سانىنىڭ جىلدىق ءوسىمى 24 پايىزدى قۇرادى. 

كۋرورت بۇگىندە ەل تۇرعىندارى مەن شەتەلدىك مەيماندار ءۇشىن ەڭ تانىمال دەمالىس ورىندارىنىڭ بىرىنە اينالىپ كەلەدى.

دەگەنمەن كەلۋشىلەر سانىنىڭ ارتۋى قۋانتقانىمەن، باعانىڭ كۇرت ءوسۋى قوعامدا الاڭداۋشىلىق تۋدىرىپ وتىر.