Eýrazıa ulttyq ýnıversıtetiniń túlekteri jeke derekterdiń taralýy múmkin ekenin málimdedi, dep habarlaıdy Dala News.
Áleýmettik jelilerde taraǵan aqparatqa sáıkes, burynǵy stýdentterge ózin ýnıversıtet rektory retinde tanystyrǵan alaıaqtar habarlasa bastaǵan. Olar jalǵan qujattar men mórlerdi paıdalanyp, senimge kirýge tyrysqan.
Túlekterdiń aıtýynsha, mundaı habarlamalar birneshe adamǵa birdeı kelgen. Bul jaǵdaı derekterdiń syrtqa shyqqany týraly kúdik týdyrǵan.
Alaıda ýnıversıtet ókilderi jeke málimetterdiń taralǵanyn joqqa shyǵardy.
Ǵylym jáne joǵary bilim mınıstri Saıasat Nurbek bul jaǵdaı baqylaýǵa alynǵanyn aıtyp, tekseris júrgiziletinin málimdedi. Al Sıfrlyq damý mınıstrligi aqparattyq qaýipsizdik komıtetine resmı suraý joldaǵan.
Qazirgi ýaqytta mán-jaıdy anyqtaý jumystary jalǵasýda.
