Óskemende burynǵy qala ákimi, Shyǵys Qazaqstan oblysy ákiminiń eks-orynbasary Jaqsylyq Omarǵa qatysty sottyń ekinshi otyrysy ótti, dep habarlaidy Dalanews.kz YK News basylymyna silteme jasap.
Sotta ol alaiaqtyq jasady jáne para aldy degen aiyptar boiynsha jaýap berýde.
Memlekettik aiyptaýshy sottan jaza taǵaiyndaý kezinde jeńildetetin jaittardy eskerýdi surady. Atap aitqanda, aiyptalýshy buryn qylmystyq jaýapkershilikke tartylmaǵan jáne jeti balanyń ákesi. Al aýyrlatatyn mán-jai retinde memlekettik qyzmetker antyn buzǵany ataldy.
Prokýror Jaqsylyq Omardy 6 jylǵa bas bostandyǵynan aiyryp, memlekettik qyzmette, jergilikti ózin-ózi basqarý organdarynda jáne kvazimemlekettik sektorda jumys isteý quqyǵynan aiyrýdy usyndy.
Al jábirlenýshi, kerisinshe, sottan ony bas bostandyǵynan aiyrmaýdy surady.
Tergeý derekterine sáikes, is eki epizodtan turady.
FBRK derekkóziniń málimetinshe, birinshi epizodta Jaqsylyq Omar qyzmette júrgen kezinde materialdyq kómek retinde berilgen kólikke qatysty jaǵdaiǵa bailanysty kúdikke ilingen.
"Jábirlenýshi 2021 jylǵy Toyota Camry 75 avtokóligin alǵanyn, keiin ony ákimdikke tapsyrǵanyn aitqan. Alaida kólik keiin úshinshi tulǵaǵa rásimdelip, trade-in baǵdarlamasy arqyly jańasyna aýystyrylǵan", - deidi derekkóz.
Keltirilgen shyǵyn shamamen 13 mln teńge dep baǵalanǵan.
Bul áreket QR Qylmystyq kodeksiniń 190-baby 3-bóligi 1 jáne 2-tarmaqtary (iri kólemdegi alaiaqtyq) boiynsha saralanǵan. Sotta jábirlenýshi shyǵyn tolyq ótelgenin aityp, talap-aryzy joq ekenin jetkizgen.
Ekinshi epizodta eks-ákimge para alý deregi boiynsha aiyp taǵylǵan.
Tergeý nusqasy boiynsha, ol ákimdik qyzmetkerinen 20 mln teńge talap etken.
"Bul jaǵdaidan keiin qyzmetker UQK-ge (KNB) júginip, arnaiy baqylaý uiymdastyrylǵan.
Nátijesinde, úshinshi tulǵa arqyly 6 mln teńge berilgen. Keiin tintý barysynda 5,6 mln teńge tabylǵan", - dep tolyqtyrdy FBRK telegram arnasy.
Bul epizod QR Qylmystyq kodeksiniń 366-baby 3-bóligi 3-tarmaǵy (para alý) boiynsha qaralýda.
Sheneýniktiń sottaǵy sózi
Jaqsylyq Omar sotta kinásin tolyq moiyndady.
Qorǵaýshylary ony bas bostandyǵynan aiyrmaityn jaza taǵaiyndaýdy suraǵan.
Sondai-aq týystary aiyppul tóleý úshin aldyn ala 112 mln teńge kóleminde qarajat daiyndaǵany belgili boldy.
