وسكەمەندە بۇرىنعى قالا اكىمى، شىعىس قازاقستان وبلىسى اكىمىنىڭ ەكس-ورىنباسارى جاقسىلىق ومارعا قاتىستى سوتتىڭ ەكىنشى وتىرىسى ءوتتى، دەپ حابارلايدى Dalanews.kz YK News باسىلىمىنا سىلتەمە جاساپ.
سوتتا ول الاياقتىق جاسادى جانە پارا الدى دەگەن ايىپتار بويىنشا جاۋاپ بەرۋدە.
مەملەكەتتىك ايىپتاۋشى سوتتان جازا تاعايىنداۋ كەزىندە جەڭىلدەتەتىن جايتتاردى ەسكەرۋدى سۇرادى. اتاپ ايتقاندا، ايىپتالۋشى بۇرىن قىلمىستىق جاۋاپكەرشىلىككە تارتىلماعان جانە جەتى بالانىڭ اكەسى. ال اۋىرلاتاتىن ءمان-جاي رەتىندە مەملەكەتتىك قىزمەتكەر انتىن بۇزعانى اتالدى.
پروكۋرور جاقسىلىق وماردى 6 جىلعا باس بوستاندىعىنان ايىرىپ، مەملەكەتتىك قىزمەتتە، جەرگىلىكتى ءوزىن-وزى باسقارۋ ورگاندارىندا جانە كۆازيمەملەكەتتىك سەكتوردا جۇمىس ىستەۋ قۇقىعىنان ايىرۋدى ۇسىندى.
ال جابىرلەنۋشى، كەرىسىنشە، سوتتان ونى باس بوستاندىعىنان ايىرماۋدى سۇرادى.
تەرگەۋ دەرەكتەرىنە سايكەس، ءىس ەكى ەپيزودتان تۇرادى.
فبرك دەرەككوزىنىڭ مالىمەتىنشە، ءبىرىنشى ەپيزودتا جاقسىلىق ومار قىزمەتتە جۇرگەن كەزىندە ماتەريالدىق كومەك رەتىندە بەرىلگەن كولىككە قاتىستى جاعدايعا بايلانىستى كۇدىككە ىلىنگەن.
"جابىرلەنۋشى 2021 جىلعى Toyota Camry 75 اۆتوكولىگىن العانىن، كەيىن ونى اكىمدىككە تاپسىرعانىن ايتقان. الايدا كولىك كەيىن ءۇشىنشى تۇلعاعا راسىمدەلىپ، trade-in باعدارلاماسى ارقىلى جاڭاسىنا اۋىستىرىلعان"، - دەيدى دەرەككوز.
كەلتىرىلگەن شىعىن شامامەن 13 ملن تەڭگە دەپ باعالانعان.
بۇل ارەكەت ق ر قىلمىستىق كودەكسىنىڭ 190-بابى 3-بولىگى 1 جانە 2-تارماقتارى (ءىرى كولەمدەگى الاياقتىق) بويىنشا سارالانعان. سوتتا جابىرلەنۋشى شىعىن تولىق وتەلگەنىن ايتىپ، تالاپ-ارىزى جوق ەكەنىن جەتكىزگەن.
ەكىنشى ەپيزودتا ەكس-اكىمگە پارا الۋ دەرەگى بويىنشا ايىپ تاعىلعان.
تەرگەۋ نۇسقاسى بويىنشا، ول اكىمدىك قىزمەتكەرىنەن 20 ملن تەڭگە تالاپ ەتكەن.
"بۇل جاعدايدان كەيىن قىزمەتكەر ۇقك-گە (كنب) جۇگىنىپ، ارنايى باقىلاۋ ۇيىمداستىرىلعان.
ناتيجەسىندە، ءۇشىنشى تۇلعا ارقىلى 6 ملن تەڭگە بەرىلگەن. كەيىن ءتىنتۋ بارىسىندا 5،6 ملن تەڭگە تابىلعان"، - دەپ تولىقتىردى فبرك تەلەگرام ارناسى.
بۇل ەپيزود ق ر قىلمىستىق كودەكسىنىڭ 366-بابى 3-بولىگى 3-تارماعى (پارا الۋ) بويىنشا قارالۋدا.
شەنەۋنىكتىڭ سوتتاعى ءسوزى
جاقسىلىق ومار سوتتا كىناسىن تولىق مويىندادى.
قورعاۋشىلارى ونى باس بوستاندىعىنان ايىرمايتىن جازا تاعايىنداۋدى سۇراعان.
سونداي-اق تۋىستارى ايىپپۇل تولەۋ ءۇشىن الدىن الا 112 ملن تەڭگە كولەمىندە قاراجات دايىنداعانى بەلگىلى بولدى.
