Áleýmettik jelide Atyraý oblysynyń Jylyoi aýdanynda kózge túsken áskeri tehnika qyzý talqylanyp jatyr. Osyǵan bailanysty Qorǵanys ministrligi resmi málimdeme jasap, jaǵdaidyń mán-jaiyn túsindirdi, dep habarlaidy Dalanews.kz.
Áleýmettik jelilerde temirjol jáne avtojol arqyly qozǵalyp jatqan áskeri tehnikanyń videosy men fotosy keńinen tarady. Bul kórinis kópshilik arasynda túrli boljamnyń týyndaýyna sebep boldy.
Qorǵanys ministrliginiń málimetinshe, atalǵan qozǵalys jospardan tys emes. Vedomstvo ókilderi bul áýe shabýylyna qarsy qorǵanys bólimsheleriniń jaýyngerlik daiarlyq aiasyndaǵy josparly oryn aýystyrýy ekenin atap ótti.
Resmi habarlamada bólimshelerdiń mobildiligin arttyrý, ózara úilesimdiligin jetildirý jáne qoiylǵan mindetterdi oryndaýǵa daiyndyq deńgeiin kúsheitý jumystary júrgizilip jatqany aitylǵan. Sondai-aq mańyzdy nysandar men aýmaqtardy qorǵaý máseleleri de pysyqtalyp jatyr.
Ministrlik mundai oqý-jattyǵýlar Qarýly Kúshterdiń kúndelikti tájiribesine jatatynyn jáne bekitilgen josparǵa sáikes ótetinin málimdedi.
Qorǵanys ministrligi turǵyndardy jáne BAQ ókilderin tekserilmegen aqparatty taratpaýǵa shaqyryp, tek resmi derekkózderge súiený qajettigin eskertti.
