Atyraý oblysynda polısıa talabyn elemeı, qashýǵa árekettengen 18 jastaǵy turǵyn 10 táýlikke ákimshilik qamaýǵa alyndy, dep habarlaıdy Dala News.

Oqıǵa 28 naýryz kúni Isataı aýdanynda bolǵan. Polısıa málimetinshe, Lada Priora kóligin basqarǵan jas jigit toqtaý týraly zańdy talapty oryndamaı, qashyp ketpek bolǵan. Keıin ol ustaldy.

Tekserý barysynda júrgizýshiniń kólik basqarýǵa quqyǵy joq ekeni anyqtalǵan. Ol birneshe bap boıynsha jaýapkershilikke tartyldy, sonyń ishinde kólikti quqyqsyz basqarý jáne polısıa qyzmetine kedergi keltirý.

Sot sheshimimen oǵan 10 táýlikke ákimshilik qamaý jazasy taǵaıyndaldy.

Sonymen qatar, oqıǵaǵa qatysy bar basqa tulǵalar da jazalandy. 57 jastaǵy áıel polısıanyń áreketine kedergi keltirgeni úshin jaýapqa tartylsa, kólik ıesi basqarýdy quqyqsyz adamǵa bergeni úshin jazalandy.

Jas jigit oqıtyn oqý ornyna da profılaktıkalyq sharalar qabyldaý týraly usynys joldandy.

Polısıa bul jaǵdaı zań talaptaryn elemeý jazasyz qalmaıtynyn kórsetetinin atap ótti.