Atyraý munaı óńdeý zaýyty turǵyndardyń shaǵymynan keıin 520 mln teńge kóleminde aıyppul tóledi, dep habarlaıdy Dala News.

Ekologıa komıtetiniń málimetinshe, tekseris barysynda kásiporyn birqatar zańbuzýshylyqtarǵa jol bergen. Atap aıtqanda, zıandy zattardyń shyǵaryndylary normadan asyp ketken, apatty jaǵdaı týraly ýaqtyly habar berilmegen jáne aǵyn sýlar zańsyz tógilgen.

Tekseris turǵyndardyń qańtar aıyndaǵy jappaı shaǵymynan keıin júrgizilgen. Qala men mańaıdaǵy eldi mekenderde kúkirttiń ótkir ıisi taraǵany aıtylǵan.

Ólsheý nátıjeleri jaǵdaıdyń kúrdeli bolǵanyn kórsetti. Máselen, Hımposólok aýdanynda kúkirtsýtek deńgeıi normadan 36 ese joǵary tirkelgen. Tasqala aýylynda bul kórsetkish 17,5 ese, al jaqyn aýmaqtarda 15 ese asqan.

Mamandardyń aıtýynsha, tekseris kezinde jel zaýyttan turǵyn aımaqtarǵa qaraı soǵyp, joǵary ylǵaldylyq ıistiń taralýyn kúsheıtken.

Sot sheshimimen zaýytqa úsh ákimshilik hattama toltyrylyp, jalpy somasy 520 mln teńge aıyppul salyndy.

Alaıda kásiporyn tekseris nátıjelerimen kelispeı, sheshimdi qaıta qaraýdy surap, joǵary turǵan organǵa júgingen.