«Eýraziia álemi» pikir saiys klýbynda bas qosqan sarapshylar men saiasattanýshylar «Ǵylymi-tehnikalyq áriptestiktiń integratsiiasy: Eýraziialyq keńistiktegi damý qarqyny» atty taqyrypty talqyǵa saldy.
Saiasattanýshy Edýard Poletaevtyń aitýynsha Eýraziialyq odaq aiasynda birlesken ǵylymi-tehnikalyq jobalar jasaýǵa ábden bolady.
«Odaqqa birikpegen memleketterdiń ózderi ǵylymi-tehnikalyq áriptestikti jaqsy jolǵa qoiǵan. Men bilsem iPhone jobasy osyndai ǵylymi-tehnikalyq áriptestiktiń jemisi. Sebebi, bul jobany Qytaida jasaidy, AQSh-ta ázirleidi. Nelikten dál osyndai ideiany Qazaqstan men Reseige birigip jasamasqa?» deidi Poletaev.
Al jýrnalist Vladislav Iýritsinniń aitýynsha, ǵylymi-tehnikalyq áriptestik odaqqa birikken memleketterge aýadai qajet. «Batystyń sanktsiiasy salqynyn tigizip jatyr. AQSh tehnologiiasyna táýeldi bolmaýy úshin biz óz jobalarymyzdy jasaýǵa tiispiz» deidi ol.
Jýrnalist Sergei Kozlovtyń pikirinshe, mundai áriptestik qajet. Biraq, buǵan Qazaqstannyń áleýeti jete me, másele osynda.
«Kóp ǵalymdardy bilemin. Biznes te, memleket te ǵylymdy qajet etpeidi. Ǵylym men óndiristiń bailanyspen otyrǵany sondyqtan» deidi olar. Demek, bul baǵytta jasalatyn jumystar jetip artylady»
deidi Kozlov.
Óz kezeginde saiasattanýshy Aigúl Omarova áriptesiniń sózimen kelisetinin aityp, Qazaqstannan milybastardyń ketip jatqanyn tilge tiek etti.
«Meniń Jańasibirdegi mehmatty bitirgen týysqanym qazir Londondaǵy halyqaralyq kompaniiada jumys isteidi. Sebebi, Qazaqstanda úsh jyl boiy jumys tappai júrdi.
Aitaiyn degenim bizde ǵylymǵa serpin beretin mamandar bar. Biraq, olar óz elinde baǵalanbai júr. Saldarynan shetelge ketip jatyr…» dedi Omarova.
Jiyndy túiindegen saiasattanýshy Anton Morozov mundai áriptestiktiń is júzinde júzege asaryna kúmán keltirdi.
«Eýraziialyq odaqqa birikken elder qandai bir ǵylymi jobany álemge tanystyrdy ma? Osy baǵytta qandai jetistikterimiz bar degen maqsatpen Eýraziialyq ekonomikalyq odaqtyń qujattaryn qoparyp kórgen edim. Túk tappadym. Anyǵy, túk joq.
Saiyp kelgende, barlyǵy sóz júzinde qalyp jatyr. Naqty jumys joq. Pompezdi deklaratsiialarǵa qol qoiylady. Sol kúiinde qalady» dedi ol.
