«ECOJER» kongressinde elimiz klimattyń ózgerýine beiimdelý sharalaryn qolǵa alatyny málim boldy
– Halyqaralyq yntymaqtastyqty nyǵaitý jáne jaǵymsyz saldardy azaitý úshin ulttyq zańnamaǵa klimattyń ózgerýine beiimdelý normalary engizildi. Bul jergilikti deńgeide tózimdilikti arttyrýdyń tiimdi júiesin qalyptastyrýǵa múmkindik beredi. Iske asyrý úderisi eń osal sektorlardy tolyq baǵalaýdan bastalady. Sý, aýyl sharýashylyǵy, orman jáne azamattyq qorǵaý qashanda mańyzdy. Nátijesinde salalyq memlekettik baǵdarlamalardyń aiasynda ulttyq jáne jergilikti deńgeilerde klimattyq táýekelderdi eskerý jáne klimattyń ózgerýine beiimdelý úshin qajetti sharalardy ázirleý múmkin bolady, – dedi Maǵzum Mirzaǵaliev.
Óz kezeginde Eýropalyq Odaqtyń qorshaǵan orta, muhit jáne balyq sharýashylyǵy jónindegi komissary Virginiiýs Cinkiavichiýs Qazaqstan men EO klimat pen ekologiiaǵa qatysty eń mańyzdy máseleler boiynsha, sondai-aq, jahandyq «jasyl kóshýdi» qamtamasyz etý jolynda turaqty yntymaqtastyqqa daiyn ekendigin aitty.
– Klimat daǵdarysy, bioalýantúrlilik jáne lastaný daǵdarysy – jedel sharalardy qajet etetin jahandyq másele. Jahandyq jasyl kóshýdi qamtamasyz etý úshin biz tyǵyz yntymaqtastyqta jumys jasaýymyz kerek. Búgingi konferentsiia EO pen Qazaqstan arasyndaǵy klimat jáne qorshaǵan ortany qorǵaý máseleleri boiynsha yntymaqtastyqty tereńdetýge septigin tigizetindigine senemin, – dedi Sinkiavichiýs.
Jeti paneldik sessiiadan turǵan halyqaralyq kongress otyrysy Dúniejúzilik qorshaǵan ortany qorǵaý kúni qarsańynda Qazaqstan táýelsizdiginiń 30 jyldyǵyn merekeleý aiasynda ótkizildi. Kongresske qatysýshylar Qazaqstan men Eýropalyq Odaq arasyndaǵy klimattyq yntymaqtastyqty, óndiristi «jasyldandyrýdyń» bolmysy men keleshegin, sondai-aq ainalmaly ekonomika jáne «aqyldy qalalar» máselelerin talqylady.
Sessiianyń alǵashqy panelinde áielderdiń álem ekologiiasyndaǵy róli, reprodýktivti densaýlyqtary qorshaǵan ortaǵa qatysý suraqtary kóterilip, jańa Ekologiialyq kodeks usynyldy. «Qaldyqtardy jaǵý jáne qaita óńdeý» taqyrybyndaǵy talqylaýda Ekologiia ministrliginiń ókilderi men tabiǵatty qorǵaý belsendileri Qazaqstanda qaldyqtardy órteý zaýyttaryn salýdyń oń jáne teris jaqtaryn qarastyrdy.
Óz kezeginde Qazaqstan Respýblikasy Prezidentiniń halyqaralyq seriktestik ókili Erjan Qazyhan memleket basshysynyń Kongress qatysýshylaryna joldaǵan úndeýin oqydy.
– Turaqty damý tujyrymdamasy «ekologiia-ekonomika-qoǵam» úshtiginiń úilesimdi ózara áreketin kózdeidi, sondyqtan Qazaqstan ekologiialyq máselelerdi sheshýdi keiinge qaldyra almaidy. Men qoǵam, biznes jáne úkimettiń ekologiialyq máselelerdi sheshýge jáne halyqtyń ekologiialyq mádenietin kóterýge baǵyttalǵan kúsh-jigerin biriktiretin jańa dialog alańynyń qurylýyn quptaimyn. Dúniejúzilik qorshaǵan ortany qorǵaý kúni qarsańynda kongress otyrystaryn ótkizý jaqsy dástúrge ainalady dep senemin, – degen Qasym-Jomart Toqaev.
Kongress qorytyndysy boiynsha Parij kelisimi aiasynda Qazaqstannyń mindettemelerine qol jetkizýi jónindegi usynystary men usynymdary kórsetilgen rezoliýtsiia qabyldandy. ECOJER qaýymdastyǵy QR Ekologiia, geologiia jáne tabiǵi resýrstar ministrliginiń qoldaýymen atalǵan is-sharanyń uiymdastyrýshysy boldy. Kongrestiń seriktesi – elimizdegi Eýropalyq Odaq Ókildigi.
