Qazaqstannyń kásibı boks federasıasynyń prezıdenti Rahymjan Erdenbekov basy daýǵa qalǵan Jánibek Álimhanulynyń dopıng-test nátıjeleri boıynsha V synamasyn ashýdyń resmı kúni men ýaqyty belgilengenin habarlady. Bul kezeń prosestik ashyqtyq pen sportshynyń quqyqtaryn saqtaý turǵysynan asa mańyzdy bolyp sanalady, dep habarlaıdy Dalanews.kz.

Rahymjan Erdenbekovtiń aıtýynsha, álemdik tájirıbede V synamasyn taldaý tek A synamasynyń bastapqy derekterin rastaý nemese joqqa shyǵarý qajettiligi týyndaǵan jaǵdaıda ǵana júrgiziledi. Prosedýra táýelsiz akkredıttelgen zerthanada júzege asyrylady jáne sportshy ókilderi men múddeli taraptardyń qatysý múmkindigin qosa alǵanda, barlyq hattamalar qatań saqtalady. Dál osy tetik kez kelgen qatelik pen burmalaýdy boldyrmaı, obektıvtiliktiń basty kepili bolyp tabylady.

«Qazaqstannyń kásibı boks federasıasy V synamasyn ashý kúniniń belgilenýi eshqandaı quqyqbuzýshylyqty moıyndaý bolyp sanalmaıtynyn jáne aldyn ala qorytyndy jasalmaıtynyn atap ótedi. Bul - halyqaralyq antıdopıngtik normalarda kózdelgen, naqty derekterdi túpkilikti anyqtaýǵa baǵyttalǵan standartty reglamenttik qadam. Federasıanyń ustanymy birizdi ári ınstıtýsıonaldyq sıpatta: eki synama boıynsha resmı qorytyndy alynǵanǵa deıin kez kelgen jarıa málimdeme, boljam nemese baǵalaý pikirlerine jol berilmeıdi. Adal sport qaǵıdattary men sportshylardyń quqyqtaryn qorǵaý tek rastalǵan derekterge ǵana negizdelýi tıis, aqparattyq dabyraǵa emes», - dedi ol.

Jaǵdaıǵa qatysty túpkilikti aqparat pen quqyqtyq baǵa barlyq belgilengen rásimder aıaqtalyp, ýákiletti antıdopıngtik organdardan resmı qujattar alynǵannan keıin usynylady. Óz kezeginde Qazaqstannyń kásibı boks federasıasy VADA uıymynan A synamasy boıynsha resmı ári tolyq jaýap kútýde. 

Esterińizde buǵan deıin kásipqoı boks sheberi Jánibek Álimhanuly dopıng daýyna tap bolyp, onyń mańyzdy jekpe-jegi ótpeı qalǵan.