2026 jyly Maraldy aýyldyq okrýgin damytýǵa 600 million teńge bólinedi. Bul týraly Shyǵys Qazaqstan oblysynyń ákimi Nurymbet Saqtaǵanovtyń Maraldy aýylynyń turǵyndarymen kezdesýinde belgili boldy, dep habarlaidy Dalanews.kz.
Aimaq basshysynyń aitýynsha, 2025 jyly jergilikti altyn óndirýshi kompaniiamen jasalǵan memorandým aiasynda okrýgtiń áleýmettik-ekonomikalyq damýyna 400 million teńge bólindi. Atalǵan qarajat esebinen Qystaý–Kúrshim aýylyndaǵy ortalyq kóshe jóndelip, Maraldy aýylyndaǵy Uly Otan soǵysy ardagerlerine arnalǵan alleiaǵa granit taqtaishalar tóseldi.
Sonymen qatar turǵyndardyń qolailylyǵy úshin Starlink spýtniktik interneti ornatylyp, ortalyq saiabaqtyń qorshaýy jańartyldy. Aýyl stadiony jańa sporttyq qural-jabdyqtarmen tolyqtyrylyp, jalpy paidalanymdaǵy joldar men ótkelder abattandyryldy. Budan bólek, Úshbulaq jáne Qystaý–Kúrshim aýyldarynda shaǵyn fýtbol alańdary, jas mamandar úshin turǵyn úiler salyndy.
Keler jyly okrýgtiń damýyna 600 million teńge bólinedi. Barlyq jumystar turǵyndardyń usynystary men ótinishteri eskerile otyryp júrgiziledi.
Kezdesý barysynda oblys ákimi Maraldynyń tarihi mańyzyna toqtalyp, aýyldyń bolashaǵyna senim bildirdi.
«Týǵan jer – altyn besigim» deidi dana halqymyz. Maraldy – ata-babamyzdyń izi qalǵan, mańdai termen kórkeigen, bizge amanat bolyp jetken qasietti meken. Búgin biz Jańa Maraldy týraly aityp otyrmyz. Jańa Maraldy – bul jai sóz emes, bul – naqty ister, ár turǵynǵa kórinip otyrǵan nátijeler. Jańa Maraldy – úmit, senim jáne bolashaqqa jasalǵan qadam», – dedi oblys ákimi Nurymbet Saqtaǵanov.
