12 jeltoqsanda Aıbek Smadıarovtyń Syrtqy ister mınıstrligindegi qyzmetinen ketýi qoǵamda túrli pikir týdyrǵan edi. Birqatar aqparat kózi onyń memlekettik qyzmetten birjola ketip, jeke sektorǵa aýysýy múmkin ekenin jazdy. Alaıda bul boljamdar rastalmaı, araǵa nebári úsh kún salyp ol Prezıdent ákimshiliginiń eń yqpaldy qurylymdarynyń biri - İshki saıasat bóliminiń meńgerýshisi qyzmetine taǵaıyndaldy. Atalǵan kadrlyq sheshimge saıasattanýshy Tolǵanaı Úmbetálıeva kásibı ári saıası turǵydan baǵa berdi, dep habarlaıdy Dalanews.kz.
Sarapshynyń aıtýynsha, Smadıarovtyń syrtqy saıasattaǵy kópjyldyq tájirıbesi onyń ishki saıasattaǵy qyzmetine de oń áser etýi múmkin. Ásirese 2022 jyldan beri Syrtqy ister mınıstrliginiń resmı ustanymyn túsindirý barysynda onyń kásibıligi, salqynqandylyǵy jáne naqty pozısıasy aıqyn kórine bastady, deıdi.
“Syrtqy saıasat Ýkraınadaǵy soǵys bastalǵannan keıin ǵana erekshe mańyzǵa ıe boldy. Osy kezeńnen bastap onyń ishki saıasatqa tikeleı áser etkeni baıqaldy. 2022 jyldan bergi ýaqytty negizge alsaq, Syrtqy ister mınıstrliginiń ustanymy anyq, naqty ári dıplomatıalyq stılde jetkizildi. Bul turǵyda Aıbek Smadıarov ózin kásibı kadr retinde kórsete aldy”, – deıdi Tolǵanaı Úmbetálıeva.
Saıasattanýshy onyń emosıaǵa berilmeıtin, ustamdy stılin de joǵary baǵalady. Onyń pikirinshe, laýazymdy saıasatker úshin salqynqandy bolý aıtarlyqtaı artyqshylyq beredi.
“Kásibılik turǵysynan oǵan syn aıtý qıyn. Jalpy, saıasatker úshin emosıasyn baqylaýda ustaı bilý mańyzdy. Bıliktiń joǵary satysyndaǵy tulǵalar barynsha salqynqandy, ustamdy bolýy tıis. Saıasattaǵy shamadan tys emosıa, kerisinshe, keri áserin tıgizedi. Árıne, keı jaǵdaıda aldyn ala oılastyrylǵan senarı aıasynda emosıa ádeıi kórsetilýi múmkin, bul - strategıanyń bir bóligi. Alaıda tutastaı alǵanda, "emosıany basqara alý" saıasatkerdiń eń myqty qyrlarynyń biri dep aıtar edim”, – deıdi sarapshy.
Onyń sózinshe, ishki saıasatta qysym men emosıaǵa jeteleıtin jaǵdaılar jıi kezdesedi. Mundaı sátterde sheshimdi sezimge berilmeı, aqylmen qabyldaý asa mańyzdy.
“Sondyqtan onyń emosıasyn tizgindeý qabileti bolashaqta saıası mansaby úshin jaqsy múmkindik ashýy ábden múmkin”, - deıdi ol.
Sarapshy Smadıarovtyń ishki saıasatqa aýysýyn Prezıdent Qasym-Jomart Toqaevpen burynnan qalyptasqan kásibı senimimen baılanystyrady. Onyń pikirinshe, memleket basshysyna ishki saıasatta tájirıbeli, senimdi ári júıeli oılaıtyn kadr qajet.
“Toqaev ony mártebesine saı keletin, eń qolaıly laýazymǵa ornalastyrdy dep oılaımyn. Prezıdenttiń mundaı tájirıbeli mamandy ózinen alys jibermeýi túsinikti. Ákimshilik qurylymda ishki saıasat baǵyty kadrlyq qajettilikten týyndaǵan bolýy múmkin. Endi ol ishki saıasat bólimine jetekshilik etedi. Tıisinshe, el ishinde ne bolyp jatqanynan tolyq habardar bolady ári belgili bir deńgeıde yqpal ete alady”, - dep qosty ol.
Aıtýynsha, syrtqy jáne ishki saıasat ózara tyǵyz baılanysty uǵymdar.
“Syrtqy saıasat árdaıym ishki saıasattyń jalǵasy. Sondyqtan bul salada jumys istegen adam ishki prosesterdi de jaqsy túsinedi. Menińshe, bul onyń ózi úshin jańa tájirıbe, jańa jumys baǵyty. Endi ol jaǵdaıǵa basqa qyrynan qaraıtyn bolady. Bul ózgeris eń aldymen Toqaevpen qalyptasqan kásibı senimniń nátıjesi”, - dedi ol.
Sarapshynyń paıymynsha, aldaǵy ýaqytta Smadıarovqa syrtqy jáne ishki saıasatty úılestirý mindeti júktelýi múmkin.
“Onyń negizgi mısıasy da osyǵan baılanysty bolýy yqtımal”, - deıdi Úmbetálıeva.
Sonymen qatar saıasattanýshy Aıbek Smadıarovtyń medıamen jumys isteý tájirıbesine de nazar aýdardy. Aıtýynsha, ol Syrtqy ister mınıstrliginde qyzmet etken kezeńde buqaralyq aqparat quraldarymen ashyq ári senimdi baılanys ornata alǵan.
“Balaeva hanymnyń kezeńinde memleket pen BAQ arasyndaǵy qarym-qatynas kúrdelene tústi. Al Smadıarov, kerisinshe, medıamen tıimdi dıalog ornata bildi. Áleýmettik jelilerdegi belsendiligine qaraǵanda, jýrnalısermen senimdi ári ashyq qarym-qatynas qalyptastyrǵan”, - deıdi sarapshy.
Saıasattanýshynyń aıtýynsha, bul faktorlar onyń ishki saıasattaǵy rólin kúsheıtip, aldaǵy ýaqytta yqpaldy tulǵalardyń birine aınalýyna negiz bola alady.
“Onyń naqty jumys stılin ýaqyt kórsetedi. Degenmen qazirgi paıymym boıynsha, ol kásibılikke, quzyrettilikke jáne naqty mindetterdi oryndaýǵa basymdyq beretin sheneýnik”, – dep túıindedi Tolǵanaı Úmbetálıeva.
