12 جەلتوقساندا ايبەك سمادياروۆتىڭ سىرتقى ىستەر مينيسترلىگىندەگى قىزمەتىنەن كەتۋى قوعامدا ءتۇرلى پىكىر تۋدىرعان ەدى. ءبىرقاتار اقپارات كوزى ونىڭ مەملەكەتتىك قىزمەتتەن ءبىرجولا كەتىپ، جەكە سەكتورعا اۋىسۋى مۇمكىن ەكەنىن جازدى. الايدا بۇل بولجامدار راستالماي، اراعا نەبارى ءۇش كۇن سالىپ ول پرەزيدەنت اكىمشىلىگىنىڭ ەڭ ىقپالدى قۇرىلىمدارىنىڭ ءبىرى - ىشكى ساياسات ءبولىمىنىڭ مەڭگەرۋشىسى قىزمەتىنە تاعايىندالدى. اتالعان كادرلىق شەشىمگە ساياساتتانۋشى تولعاناي ۇمبەتالييەۆا كاسىبي ءارى ساياسي تۇرعىدان باعا بەردى، دەپ حابارلايدى Dalanews.kz.
ساراپشىنىڭ ايتۋىنشا، سمادياروۆتىڭ سىرتقى ساياساتتاعى كوپجىلدىق تاجىريبەسى ونىڭ ىشكى ساياساتتاعى قىزمەتىنە دە وڭ اسەر ەتۋى مۇمكىن. اسىرەسە 2022 جىلدان بەرى سىرتقى ىستەر مينيسترلىگىنىڭ رەسمي ۇستانىمىن ءتۇسىندىرۋ بارىسىندا ونىڭ كاسىبيلىگى، سالقىنقاندىلىعى جانە ناقتى پوزيسياسى ايقىن كورىنە باستادى، دەيدى.
“سىرتقى ساياسات ۋكرايناداعى سوعىس باستالعاننان كەيىن عانا ەرەكشە ماڭىزعا يە بولدى. وسى كەزەڭنەن باستاپ ونىڭ ىشكى ساياساتقا تىكەلەي اسەر ەتكەنى بايقالدى. 2022 جىلدان بەرگى ۋاقىتتى نەگىزگە الساق، سىرتقى ىستەر مينيسترلىگىنىڭ ۇستانىمى انىق، ناقتى ءارى ديپلوماتيالىق ستيلدە جەتكىزىلدى. بۇل تۇرعىدا ايبەك سمادياروۆ ءوزىن كاسىبي كادر رەتىندە كورسەتە الدى”، – دەيدى تولعاناي ۇمبەتالييەۆا.
ساياساتتانۋشى ونىڭ ەموسياعا بەرىلمەيتىن، ۇستامدى ءستيلىن دە جوعارى باعالادى. ونىڭ پىكىرىنشە، لاۋازىمدى ساياساتكەر ءۇشىن سالقىنقاندى بولۋ ايتارلىقتاي ارتىقشىلىق بەرەدى.
“كاسىبيلىك تۇرعىسىنان وعان سىن ايتۋ قيىن. جالپى، ساياساتكەر ءۇشىن ەموسياسىن باقىلاۋدا ۇستاي ءبىلۋ ماڭىزدى. بيلىكتىڭ جوعارى ساتىسىنداعى تۇلعالار بارىنشا سالقىنقاندى، ۇستامدى بولۋى ءتيىس. ساياساتتاعى شامادان تىس ەموسيا، كەرىسىنشە، كەرى اسەرىن تيگىزەدى. ارينە، كەي جاعدايدا الدىن الا ويلاستىرىلعان سەناريي اياسىندا ەموسيا ادەيى كورسەتىلۋى مۇمكىن، بۇل - ستراتەگيانىڭ ءبىر بولىگى. الايدا تۇتاستاي العاندا، "ەموسيانى باسقارا الۋ" ساياساتكەردىڭ ەڭ مىقتى قىرلارىنىڭ ءبىرى دەپ ايتار ەدىم”، – دەيدى ساراپشى.
ونىڭ سوزىنشە، ىشكى ساياساتتا قىسىم مەن ەموسياعا جەتەلەيتىن جاعدايلار ءجيى كەزدەسەدى. مۇنداي ساتتەردە شەشىمدى سەزىمگە بەرىلمەي، اقىلمەن قابىلداۋ اسا ماڭىزدى.
“سوندىقتان ونىڭ ەموسياسىن تىزگىندەۋ قابىلەتى بولاشاقتا ساياسي مانسابى ءۇشىن جاقسى مۇمكىندىك اشۋى ابدەن مۇمكىن”، - دەيدى ول.
ساراپشى سمادياروۆتىڭ ىشكى ساياساتقا اۋىسۋىن پرەزيدەنت قاسىم-جومارت توقايەۆپەن بۇرىننان قالىپتاسقان كاسىبي سەنىمىمەن بايلانىستىرادى. ونىڭ پىكىرىنشە، مەملەكەت باسشىسىنا ىشكى ساياساتتا تاجىريبەلى، سەنىمدى ءارى جۇيەلى ويلايتىن كادر قاجەت.
“توقايەۆ ونى مارتەبەسىنە ساي كەلەتىن، ەڭ قولايلى لاۋازىمعا ورنالاستىردى دەپ ويلايمىن. پرەزيدەنتتىڭ مۇنداي تاجىريبەلى ماماندى وزىنەن الىس جىبەرمەۋى تۇسىنىكتى. اكىمشىلىك قۇرىلىمدا ىشكى ساياسات باعىتى كادرلىق قاجەتتىلىكتەن تۋىنداعان بولۋى مۇمكىن. ەندى ول ىشكى ساياسات بولىمىنە جەتەكشىلىك ەتەدى. تيىسىنشە، ەل ىشىندە نە بولىپ جاتقانىنان تولىق حاباردار بولادى ءارى بەلگىلى ءبىر دەڭگەيدە ىقپال ەتە الادى”، - دەپ قوستى ول.
ايتۋىنشا، سىرتقى جانە ىشكى ساياسات ءوزارا تىعىز بايلانىستى ۇعىمدار.
“سىرتقى ساياسات ءاردايىم ىشكى ساياساتتىڭ جالعاسى. سوندىقتان بۇل سالادا جۇمىس ىستەگەن ادام ىشكى پروسەستەردى دە جاقسى تۇسىنەدى. مەنىڭشە، بۇل ونىڭ ءوزى ءۇشىن جاڭا تاجىريبە، جاڭا جۇمىس باعىتى. ەندى ول جاعدايعا باسقا قىرىنان قارايتىن بولادى. بۇل وزگەرىس ەڭ الدىمەن توقايەۆپەن قالىپتاسقان كاسىبي سەنىمنىڭ ناتيجەسى”، - دەدى ول.
ساراپشىنىڭ پايىمىنشا، الداعى ۋاقىتتا سمادياروۆقا سىرتقى جانە ىشكى ساياساتتى ۇيلەستىرۋ مىندەتى جۇكتەلۋى مۇمكىن.
“ونىڭ نەگىزگى ميسسياسى دا وسىعان بايلانىستى بولۋى ىقتيمال”، - دەيدى ۇمبەتالييەۆا.
سونىمەن قاتار ساياساتتانۋشى ايبەك سمادياروۆتىڭ مەديامەن جۇمىس ىستەۋ تاجىريبەسىنە دە نازار اۋداردى. ايتۋىنشا، ول سىرتقى ىستەر مينيسترلىگىندە قىزمەت ەتكەن كەزەڭدە بۇقارالىق اقپارات قۇرالدارىمەن اشىق ءارى سەنىمدى بايلانىس ورناتا العان.
“بالايەۆا حانىمنىڭ كەزەڭىندە مەملەكەت پەن ب ا ق اراسىنداعى قارىم-قاتىناس كۇردەلەنە ءتۇستى. ال سمادياروۆ، كەرىسىنشە، مەديامەن ءتيىمدى ديالوگ ورناتا ءبىلدى. الەۋمەتتىك جەلىلەردەگى بەلسەندىلىگىنە قاراعاندا، جۋرناليستەرمەن سەنىمدى ءارى اشىق قارىم-قاتىناس قالىپتاستىرعان”، - دەيدى ساراپشى.
ساياساتتانۋشىنىڭ ايتۋىنشا، بۇل فاكتورلار ونىڭ ىشكى ساياساتتاعى ءرولىن كۇشەيتىپ، الداعى ۋاقىتتا ىقپالدى تۇلعالاردىڭ بىرىنە اينالۋىنا نەگىز بولا الادى.
“ونىڭ ناقتى جۇمىس ءستيلىن ۋاقىت كورسەتەدى. دەگەنمەن قازىرگى پايىمىم بويىنشا، ول كاسىبيلىككە، قۇزىرەتتىلىككە جانە ناقتى مىندەتتەردى ورىنداۋعا باسىمدىق بەرەتىن شەنەۋنىك”، – دەپ تۇيىندەدى تولعاناي ۇمبەتالييەۆا.
