Almatyda Jańa jyl qarsańynda pirotehnikany paidalanatyndarǵa baqylaý kúsheidi. Jyl saiyn mereke kúnderi qalada orta eseppen 13 órt tirkeledi, onyń shamamen 15%-y saliýt pen petardadan shyǵady eken. Bul týraly ÓKQ-da ótken baspasóz konferentsiiasynda Almaty qalasy Tótenshe jaǵdailar departamentiniń Memlekettik órt baqylaý basqarmasynyń bas mamany Rýslan Qasenov málimdedi, dep habarlaidy Dalanews.kz.
Onyń aitýynsha, keiingi bes jylda Almatyda Jańa jylda 68 órt tirkelse, sonyń 10-y pirotehnikany qoldanǵan kezde bolǵan.
"2025 jylǵy 5 jeltoqsannan 2026 jylǵy 3 qańtarǵa deiin ruqsatsyz saýda men qaýipti ónimderdi anyqtaý maqsatynda pirotehnikalyq ónimderdi saqtap, satatyn oryndarǵa reid júrgizile bastady. Qazirdiń ózinde Jetisý men Medeý aýdanynda osyndai reidter ótti", – dedi Rýslan Qasenov.
Qala turǵyndary men qonaqtaryna pirotehnikalyq buiymdardy tek mamandandyrylǵan dúkenderden satyp alyp, qaptamasynyń bútindigi men jaramdylyq merzimine nazar aýdarý qajet ekeni eskertildi.
Búginde politsiia qyzmetkerlerimen birlesip reidter ótkizilgen, QR ÁQBtK-niń 196-baby boiynsha 10 ákimshilik hattama toltyrylǵan. Zańsyz satylǵan pirotehnikalyq ónimder tárkilenip, onyń bir bóligi belgilengen tártippen mórlengen.
Qutqarýshylar qarapaiym qaýipsizdik erejesin saqtaý Jańa jyldy oqys oqiǵasyz qarsy alýǵa múmkindik beretinin aitty.
