Aqmola oblysynda qaitarylǵan aktivter esebinen 12 mlrd teńgege Kokshe Arena kópfýnktsionaldy sport kesheni salyndy, dep habarlaidy Dalanews.kz.
Memleket basshysynyń 2025 jylǵy naýryzda Ulttyq quryltaidyń IV otyrysynda bergen tapsyrmasyn oryndaý aiasynda Kókshetaýda Kokshe Arena zamanaýi kópfýnktsionaldy sport kesheniniń ashylýy ótti. Nysan Arnaýly memlekettik qor qarajaty esebinen turǵyzyldy. Bul maqsatqa Úkimet 12,6 mlrd teńge bóldi.
Ǵimarattyń syiymdylyǵy shamamen 1 myń adamdy quraidy. Keshende zamanaýi mýltimediialyq júieleri bar 650 oryndyq kórermen zaly, órmeleý alańy men órt-qoldanbaly sport túrlerine arnalǵan munarasy bar ámbebap sport zaly qarastyrylǵan. Boks, kúres, aýyr atletika jáne krossfit zaldary sertifikattalǵan olimpiadalyq standarttaǵy quraldarmen jabdyqtalǵan. Halyqtyń mobildiligi tómen toptary úshin de barlyq jaǵdai jasalǵan.
Irgeles aýmaqta jeńil atletika aimaǵy, oiyn sport túrleri men laqtyrý pánderine arnalǵan alańdar, sondai-aq demalys aimaqtary jabdyqtalǵan.
Saltanatty ashylý rásimine Qazaqstan Respýblikasynyń Bas prokýrory Berik Asylov, týrizm jáne sport ministri Erbol Myrzabosynov, qarjy ministri Mádi Takiev, Aqmola oblysynyń ákimi Marat Ahmetjanov qatysty. Is-sharanyń qurmetti qonaqtary World Boxing halyqaralyq federatsiiasynyń prezidenti Gennadii Golovkin, UFC aiasynda óner kórsetetin aralas jekpe-jek sheberi Shavkat Rahmonov boldy.
Aita ketý kerek, Kokshe Arena – qaitarylǵan aktivter qarajaty esebinen salynǵan aimaqtaǵy ekinshi sporttyq infraqurylym nysany. Buǵan deiin oblysta Zerendi aýylynda balalar men jasóspirimderge arnalǵan sport mektebi ashylǵan bolatyn.
Aqmola oblysynda Arnaýly memlekettik qordyń qarajatyna barlyǵy 42 áleýmettik nysan, onyń ishinde 14 densaýlyq saqtaý mekemesi, 26 sýmen jabdyqtaý nysany jáne 2 sport mekemesiniń qurylysy josparlanǵan.
