Pavlodar oblysy PD uiymdasqan qylmysqa qarsy kúres basqarmasynyń jedel qyzmetkerleri bopsalaý faktilerine qatysy bar degen kúdikke ilingen adamdar tobyn ustady, dep habarlaidy dalanews.kz.
Kúdiktiler bir ai boiy Pavlodar qalasynyń turǵyndarynan aqsha talap etken. Aqsha bermegen jaǵdaida olarǵa kúsh qoldanatynyn jáne dene jaraqatyn keltiretinin aityp qorqytqan. Júrgizilgen jedel-izdestirý is-sharalarynyń nátijesinde jedel qyzmetkerler kúdiktilerdiń jeke basyn anyqtap, alty adamdy ustady.
Olardyń beseýi ýaqytsha ustaý izoliatoryna qamaldy.
– Bopsalaý faktileri boiynsha qylmystyq ister qozǵaldy. Qazirgi ýaqytta qajetti tergeý áreketteri júrgizilip, bolǵan oqiǵanyń barlyq mán-jaiy anyqtalýda. Sondai-aq ustalǵandardyń basqa da osyǵan uqsas qylmystarǵa qatysy bar-joǵy tekserilip jatyr, – dedi Pavlodar oblysy PD uiymdasqan qylmysqa qarsy kúres basqarmasynyń bastyǵy Ǵabit Qabdrahmanov.
