Astanada Qytaidyń Kúz ortasy merekesine jáne Qytai Halyq Respýblikasynyń qurylǵanyna 77 jyl tolýyna arnalǵan «Bir ai astyndaǵy birlik sáti» atty kontsert ótti, dep habarlaidy dalanews.kz.
Qalibek Qýanyshbaev atyndaǵy Qazaq ulttyq mýzykalyq drama teatrynyń sahnasynda Qazaqstan men Qytaidyń mýzykalyq dástúrleri toǵysyp, kórermenge halyq ánderi, vokaldyq shyǵarmalar jáne ulttyq aspaptardyń úni usynyldy.
Kúz ortasy merekesi, iaǵni Chjýntsiýtsze – Qytaidaǵy dástúrli merekelerdiń biri. Ol ai kúntizbesi boiynsha segizinshi aidyń 15-kúninde atap ótiledi. Biyl mereke 25 qyrkúiekke sáikes keledi.
Bul kún tolyq aiǵa tamashalaý, otbasymen bas qosý, amandyq pen molshylyq tileý dástúrlerimen bailanysty. Merekeniń negizgi nyshandarynyń biri – iýebin dep atalatyn dóńgelek pishindi ai bálishteri. Ol otbasy birligi men baqytty bildiredi.
Biyl Kúz ortasy merekesi Qytaidyń taǵy bir mańyzdy datasy – 1 qazanda atap ótiletin Qytai Halyq Respýblikasynyń qurylǵan kúni qarsańynda ótip otyr. Osyǵan bailanysty Astanadaǵy kontsert eki merekeni qatar qamtyp, Qazaqstan men Qytai arasyndaǵy mádeni bailanysty nyǵaitýǵa baǵyttalǵan is-sharalardyń birine ainaldy.
Keshti ashqan Qytaidyń Qazaqstandaǵy elshisi Han Chýnlin merekeniń tolyq aimen jáne jaqyn adamdardyń bas qosýymen bailanysty erekshe simvolikasyn atap ótti.
«Altyn kúz salqyn samalyn ákelip, túngi aspanda tolyq ai jarqyraidy. Al keshki Jibek jolynyń jeli shynaiy dostyqtyń jylýyn ózimen birge alyp kele jatqandai», – dedi Han Chýnlin.
Elshi kontsertti uiymdastyrýǵa qoldaý kórsetken Qazaqstannyń Mádeniet jáne aqparat ministrligine alǵys bildirdi.
Kontsert baǵdarlamasynda eki eldiń mýzykalyq dástúrlerin biriktiretin shyǵarmalarǵa erekshe oryn berildi. Kesh qazaqtyń «Júrek» halyq áni men Qytaidyń «Kún qýana kóterilip keledi» atty halyq áni oryndalǵan dýetpen bastaldy.
Keiin ónerpazdar qazaqtyń «Ana», «Týǵan jerdiń bulttary» ánderin, sondai-aq Qytaidyń birqatar halyq shyǵarmalaryn oryndady.
Baǵdarlama vokaldyq nómirlermen ǵana shektelmedi. Kórermender dástúrli qytaidyń ishekti aspaby – pipanyń, bambýk fleitasynyń, akkordeon men soqpaly aspaptardyń únin tyńdady. Sahnada áielder men erler vokaldyq ansamblderi de óner kórsetti.
Kontsert baǵdarlamasyna Shyńjań halyqtarynyń ánderi men Qytaidyń ár óńiriniń mýzykalyq murasyn tanystyratyn shyǵarmalar engizildi.
Keshtiń bir bóligi Uly Jibek joly boiyndaǵy ejelgi Dýnhýan qalasynyń mádenietine arnalǵan «Dýnhýan» ansambliniń qoiylymyna arnaldy. Ónerpazdar mýzyka arqyly Mogao úńgirleri men Dýnhýannyń kórkem murasyn tanystyryp, shyǵys jáne batys mýzykasynyń elementterin úilestirdi.
Chýntsin qalasynyń Mádeniet jáne týrizmdi damytý komiteti tóraǵasynyń orynbasary Lo Siaochýn kontsertti Qazaqstan men Qytai arasyndaǵy mádeni bailanystyń jalǵasy retinde baǵalady.
«Búgingi Kúz ortasy merekesine arnalǵan kontsert – eki memleket basshylary arasyndaǵy mańyzdy ýaǵdalastyqtardyń júzege asýynyń jarqyn kórinisi ári Mádeniet jylynyń naqty jalǵasy», – dedi Lo Siaochýn.
2026 jyldyń kókteminde Qazaqstan men Qytaidyń Mádenietaralyq jyly jariialanǵan bolatyn. Onyń aiasynda eki el arasyndaǵy mádeni-gýmanitarlyq bailanysty damytýǵa baǵyttalǵan kontsertter, kórmeler jáne basqa da jobalar uiymdastyrylyp jatyr.
Qazaqstannyń Mádeniet jáne aqparat vitse-ministri Aibek Sydykov ta eki el arasyndaǵy mádeni yntymaqtastyqtyń mańyzyn atap ótti. Onyń aitýynsha, Qazaqstan men Qytaidyń bailanysy Uly Jibek joly boiynda ǵasyrlar boiy qalyptasyp, búginde jańa deńgeige kóterilip otyr.
«Qazaqstan men Qytai arasyndaǵy mádeni-gýmanitarlyq yntymaqtastyq, Uly Jibek joly boiynda ǵasyrlar boiy qalyptasqan bailanystar búginde jańa deńgeige kóterildi», – dedi ol.
Kontsertpen qatar kórermender Chýntsinniń dástúrli qolónerimen de tanysty. Atap aitqanda, Iýnchýandaǵy dárilik hosh iisti ónimder jasaý óneri tanystyryldy. Bul dástúrde jergilikti chjannan aǵashy shópter men hosh iisti materialdarmen úilestiriledi. Shikizat birneshe kezeńnen óńdeýden ótedi. Qolóner dástúrli qytai meditsinasy men hosh iis mádenietiniń toǵysynda qalyptasqan.
Kórermenderge Isiandaǵy qaǵazdan órnek qiiý óneri de usynyldy. Sheberler túrli tústi qaǵazdardy qaishymen qiyp, gúlder, qustar, úilený toiyna qatysty beineler, baqyt pen uzaq ǵumyrdyń simvoldaryn jasaidy. Isian mektebine simmetriialy pishinder men iirimdi syzyqtar tán. Bul dástúr urpaqtan urpaqqa jalǵasyp keledi.
Kesh barlyq ónerpazdardyń «Otan áni» shyǵarmasyn birge oryndaýymen aiaqtaldy.
«Bir ai astyndaǵy birlik sáti» kontserti Qazaqstan men Qytaidyń Mádenietaralyq jyly aiasyndaǵy is-sharalardyń biri boldy. Mýzyka men dástúrli óner arqyly kórermender Chjýntsiýtsze merekesiniń ereksheligimen qatar, Chýntsin men Qytaidyń basqa da óńirleriniń mádeni murasymen tanysty.
