Астанада Қытайдың Күз ортасы мерекесіне және Қытай Халық Республикасының құрылғанына 77 жыл толуына арналған «Бір ай астындағы бірлік сәті» атты концерт өтті, деп хабарлайды dalanews.kz.
Қалибек Қуанышбаев атындағы Қазақ ұлттық музыкалық драма театрының сахнасында Қазақстан мен Қытайдың музыкалық дәстүрлері тоғысып, көрерменге халық әндері, вокалдық шығармалар және ұлттық аспаптардың үні ұсынылды.
Күз ортасы мерекесі, яғни Чжунцюцзе – Қытайдағы дәстүрлі мерекелердің бірі. Ол ай күнтізбесі бойынша сегізінші айдың 15-күнінде атап өтіледі. Биыл мереке 25 қыркүйекке сәйкес келеді.
Бұл күн толық айға тамашалау, отбасымен бас қосу, амандық пен молшылық тілеу дәстүрлерімен байланысты. Мерекенің негізгі нышандарының бірі – юэбинь деп аталатын дөңгелек пішінді ай бәліштері. Ол отбасы бірлігі мен бақытты білдіреді.
Биыл Күз ортасы мерекесі Қытайдың тағы бір маңызды датасы – 1 қазанда атап өтілетін Қытай Халық Республикасының құрылған күні қарсаңында өтіп отыр. Осыған байланысты Астанадағы концерт екі мерекені қатар қамтып, Қазақстан мен Қытай арасындағы мәдени байланысты нығайтуға бағытталған іс-шаралардың біріне айналды.
Кешті ашқан Қытайдың Қазақстандағы елшісі Хань Чуньлинь мерекенің толық аймен және жақын адамдардың бас қосуымен байланысты ерекше символикасын атап өтті.
«Алтын күз салқын самалын әкеліп, түнгі аспанда толық ай жарқырайды. Ал кешкі Жібек жолының желі шынайы достықтың жылуын өзімен бірге алып келе жатқандай», – деді Хань Чуньлинь.
Елші концертті ұйымдастыруға қолдау көрсеткен Қазақстанның Мәдениет және ақпарат министрлігіне алғыс білдірді.
Концерт бағдарламасында екі елдің музыкалық дәстүрлерін біріктіретін шығармаларға ерекше орын берілді. Кеш қазақтың «Жүрек» халық әні мен Қытайдың «Күн қуана көтеріліп келеді» атты халық әні орындалған дуэтпен басталды.
Кейін өнерпаздар қазақтың «Ана», «Туған жердің бұлттары» әндерін, сондай-ақ Қытайдың бірқатар халық шығармаларын орындады.
Бағдарлама вокалдық нөмірлермен ғана шектелмеді. Көрермендер дәстүрлі қытайдың ішекті аспабы – пипаның, бамбук флейтасының, аккордеон мен соқпалы аспаптардың үнін тыңдады. Сахнада әйелдер мен ерлер вокалдық ансамбльдері де өнер көрсетті.
Концерт бағдарламасына Шыңжаң халықтарының әндері мен Қытайдың әр өңірінің музыкалық мұрасын таныстыратын шығармалар енгізілді.
Кештің бір бөлігі Ұлы Жібек жолы бойындағы ежелгі Дуньхуан қаласының мәдениетіне арналған «Дуньхуан» ансамблінің қойылымына арналды. Өнерпаздар музыка арқылы Могао үңгірлері мен Дуньхуанның көркем мұрасын таныстырып, шығыс және батыс музыкасының элементтерін үйлестірді.
Чунцин қаласының Мәдениет және туризмді дамыту комитеті төрағасының орынбасары Ло Сяочунь концертті Қазақстан мен Қытай арасындағы мәдени байланыстың жалғасы ретінде бағалады.
«Бүгінгі Күз ортасы мерекесіне арналған концерт – екі мемлекет басшылары арасындағы маңызды уағдаластықтардың жүзеге асуының жарқын көрінісі әрі Мәдениет жылының нақты жалғасы», – деді Ло Сяочунь.
2026 жылдың көктемінде Қазақстан мен Қытайдың Мәдениетаралық жылы жарияланған болатын. Оның аясында екі ел арасындағы мәдени-гуманитарлық байланысты дамытуға бағытталған концерттер, көрмелер және басқа да жобалар ұйымдастырылып жатыр.
Қазақстанның Мәдениет және ақпарат вице-министрі Айбек Сыдыков та екі ел арасындағы мәдени ынтымақтастықтың маңызын атап өтті. Оның айтуынша, Қазақстан мен Қытайдың байланысы Ұлы Жібек жолы бойында ғасырлар бойы қалыптасып, бүгінде жаңа деңгейге көтеріліп отыр.
«Қазақстан мен Қытай арасындағы мәдени-гуманитарлық ынтымақтастық, Ұлы Жібек жолы бойында ғасырлар бойы қалыптасқан байланыстар бүгінде жаңа деңгейге көтерілді», – деді ол.
Концертпен қатар көрермендер Чунциннің дәстүрлі қолөнерімен де танысты. Атап айтқанда, Юнчуаньдағы дәрілік хош иісті өнімдер жасау өнері таныстырылды. Бұл дәстүрде жергілікті чжаньнань ағашы шөптер мен хош иісті материалдармен үйлестіріледі. Шикізат бірнеше кезеңнен өңдеуден өтеді. Қолөнер дәстүрлі қытай медицинасы мен хош иіс мәдениетінің тоғысында қалыптасқан.
Көрермендерге Исяньдағы қағаздан өрнек қию өнері де ұсынылды. Шеберлер түрлі түсті қағаздарды қайшымен қиып, гүлдер, құстар, үйлену тойына қатысты бейнелер, бақыт пен ұзақ ғұмырдың символдарын жасайды. Исянь мектебіне симметриялы пішіндер мен иірімді сызықтар тән. Бұл дәстүр ұрпақтан ұрпаққа жалғасып келеді.
Кеш барлық өнерпаздардың «Отан әні» шығармасын бірге орындауымен аяқталды.
«Бір ай астындағы бірлік сәті» концерті Қазақстан мен Қытайдың Мәдениетаралық жылы аясындағы іс-шаралардың бірі болды. Музыка мен дәстүрлі өнер арқылы көрермендер Чжунцюцзе мерекесінің ерекшелігімен қатар, Чунцин мен Қытайдың басқа да өңірлерінің мәдени мұрасымен танысты.
