Qazaqstannyń kásibi boks federatsiiasynyń prezidenti Rahymjan Erdenbekov basy daýǵa qalǵan Jánibek Álimhanulynyń doping-test nátijeleri boiynsha V synamasyn ashýdyń resmi kúni men ýaqyty belgilengenin habarlady. Bul kezeń protsestik ashyqtyq pen sportshynyń quqyqtaryn saqtaý turǵysynan asa mańyzdy bolyp sanalady, dep habarlaidy Dalanews.kz.
Rahymjan Erdenbekovtiń aitýynsha, álemdik tájiribede V synamasyn taldaý tek A synamasynyń bastapqy derekterin rastaý nemese joqqa shyǵarý qajettiligi týyndaǵan jaǵdaida ǵana júrgiziledi. Protsedýra táýelsiz akkredittelgen zerthanada júzege asyrylady jáne sportshy ókilderi men múddeli taraptardyń qatysý múmkindigin qosa alǵanda, barlyq hattamalar qatań saqtalady. Dál osy tetik kez kelgen qatelik pen burmalaýdy boldyrmai, obektivtiliktiń basty kepili bolyp tabylady.
«Qazaqstannyń kásibi boks federatsiiasy V synamasyn ashý kúniniń belgilenýi eshqandai quqyqbuzýshylyqty moiyndaý bolyp sanalmaitynyn jáne aldyn ala qorytyndy jasalmaitynyn atap ótedi. Bul - halyqaralyq antidopingtik normalarda kózdelgen, naqty derekterdi túpkilikti anyqtaýǵa baǵyttalǵan standartty reglamenttik qadam. Federatsiianyń ustanymy birizdi ári institýtsionaldyq sipatta: eki synama boiynsha resmi qorytyndy alynǵanǵa deiin kez kelgen jariia málimdeme, boljam nemese baǵalaý pikirlerine jol berilmeidi. Adal sport qaǵidattary men sportshylardyń quqyqtaryn qorǵaý tek rastalǵan derekterge ǵana negizdelýi tiis, aqparattyq dabyraǵa emes», - dedi ol.
Jaǵdaiǵa qatysty túpkilikti aqparat pen quqyqtyq baǵa barlyq belgilengen rásimder aiaqtalyp, ýákiletti antidopingtik organdardan resmi qujattar alynǵannan keiin usynylady. Óz kezeginde Qazaqstannyń kásibi boks federatsiiasy VADA uiymynan A synamasy boiynsha resmi ári tolyq jaýap kútýde.
Esterińizde buǵan deiin kásipqoi boks sheberi Jánibek Álimhanuly doping daýyna tap bolyp, onyń mańyzdy jekpe-jegi ótpei qalǵan.
