Táýelsizdik kúni qarsańynda Abai oblysy ákiminiń qoldaýymen, Ishki saiasat basqarmasynyń uiymdastyrýymen jazýshy, «Qurmet» ordeniniń iegeri, Tólegen Aibergenov atyndaǵy syilyqtyń laýreaty Ularbek Dáleiulynyń «Joshy han» jáne «Batý han» atty tarihi romandarynyń tusaýkeseri ótti.
Rýhani is-sharaǵa óńirdiń ziialy qaýym ókilderi, ǵalymdar, qalamgerler, tarihshylar, joǵary oqý oryndarynyń oqytýshylary men tarih mamandyǵy boiynsha bilim alyp jatqan stýdentter qatysty.
Tusaýkeser rásimin Abai oblysy Ishki saiasat basqarmasynyń basshysy Jarqyn Jumadilov júrgizdi.
– Memleket basshysynyń Jarlyǵymen qabyldanǵan ishki saiasattyń negizgi qaǵidattaryn, qundylyqtary men baǵyttaryn bir júiege keltirgen tujyrymdamalyq qujatta: «Qazaqstandyq patriotizm memleketke, onyń rámizderi men ulttyq mádenietine qurmetpen qaraý, elimizdiń tarihi jáne rýhani qundylyqtaryn qadirleý, Otanymyzdyń búgini men bolashaǵyna jaýapkershilikpen qaraý degen maǵynany bildiredi», – dep jazylǵan. Táýelsizdik merekesi qarsańynda el tarihynyń eń kúrdeli ári taǵdyrly kezeńderin arqaý etken Joshy han men Batý han týraly romandardyń tanystyrylýy – ulttyq rýhty nyǵaitýǵa baǵyttalǵan mańyzdy qadam. Bul qos kitapty tarihi sanany jańǵyrtý jolyndaǵy baǵa jetpes rýhani qazyna deýge bolady. Atalǵan týyndylar tarihi tulǵalardy kórkemdik pen derektilik turǵysynan jańasha paiymdaýǵa múmkindik beredi, – dedi basqarma basshysy.
Óz kezeginde tarihi romandardyń avtory Ularbek Dáleiuly shyǵarmalardyń jazylý maqsaty men ideialyq mańyzyna keńinen toqtaldy.
– Abai eline kelý – men úshin úlken mártebe. Táýelsizdik merekesi qarsańynda osyndai qasietti óńirde oqyrmandarmen júzdesý – zor jaýapkershilik. Bul kitaptar belgili bir maqsatpen, tarihqa degen tereń qurmetten týǵan eńbekter. Romandarda Joshy hannan keiin bilikke kelgen Batý hannyń jastyq shaǵy, Shyńǵys qaǵannan bata alǵan sáti, alǵashqy joryqtary men kúrdeli tarihi tartystarǵa toly kezeńi kórkem ári derekti negizde sýretteledi. Eńbek keń oqyrman aýditoriiasyna arnalǵan. Alǵashqy tirajy 2 000 dana bolyp jaryq kórip, búginde oqyrmandar tarapynan joǵary suranysqa ie bolyp otyr, – dedi avtor.
Tusaýkeser barysynda sóz alǵan ziialy qaýym ókilderi jańa týyndylarǵa joǵary baǵa berip, kitaptardyń ulttyq rýhty kúsheitýdegi, jas urpaqtyń tarihi sana-sezimin qalyptastyrýdaǵy mańyzyn atap ótti. Qatysýshylar avtorǵa suraqtar qoiyp, shyǵarmalardyń jazylý tarihy tóńireginde pikir almasty.
Is-shara sońynda mártebeli meiman Ularbek Dáleiulyna Abai oblysy ákiminiń Alǵys haty tabystalyp, qazaqtyń dástúrine sai iyǵyna shapan jabyldy.
