Memleket basshysynyń «Taza Qazaqstan» bastamasy aiasynda Sý resýrstary jáne irrigatsiia ministrligi elimizdiń barlyq óńirinde bulaqtardy tazalaýǵa baǵyttalǵan «Móldir bulaq» ekologiialyq aktsiiasyn bastady, dep habarlaidy Dalanews.kz.
Aýa raiyna bailanysty alǵashqy kezeńde aktsiia elimizdiń ońtústik óńirlerindegi 28 bulaqta ótkizildi. Atap aitqanda, Shymkent qalasy, Almaty, Jambyl, Qyzylorda, Túrkistan jáne Jetisý oblystary. Aktsiiaǵa bir mezgilde shamamen 3,8 myń adam qatysty. Olar bulaqtardyń kózin ashyp, qalpyna keltirdi. Sonymen qatar ainalasyndaǵy aýmaqtar tazartylyp, abattandyryldy, qoqys jinalyp, kóshetter otyrǵyzyldy.
Sý resýrstary jáne irrigatsiia ministri Nurjan Nurjigitov pen Jambyl oblysynyń ákimi Erbol Qarashókeev Jambyl aýdanyndaǵy Jalǵyztal bulaǵyn tazalaý jumystaryna qatysty. Bulaq Aisha bibi aýylynan 16 shaqyrym jerde ornalasqan.
Sondai-aq «Móldir bulaq» aktsiiasy aiasyndaǵy is-sharalar Jambyl oblysynyń Merki, Sarysý, Shý, Talas, Rysqulov, Baizaq jáne Qordai aýdandaryndaǵy jeti bulaqta ótti. Bulaqtardy tazalaý jumystaryna Sý resýrstary jáne irrigatsiia ministrligi mamandary, «Qazsýshar» RMK oblystyq filialynyń, Shý-Talas basseindik inspektsiiasynyń jáne Qazaq sý sharýashylyǵy ǵylymi-zertteý institýtynyń qyzmetkerleri, sondai-aq eriktiler men stýdentter qatysty.
Sý resýrstary jáne irrigatsiia ministrliginiń bastamasymen Jambyl oblysynda sý salasyndaǵy alǵashqy eriktiler qozǵalysy – «Bolashaqtyń qainary» quryldy. Onyń qataryna Taraz qalasyndaǵy Qazaq ulttyq sý sharýashylyǵy jáne irrigatsiia ýniversitetiniń stýdentteri qosyldy. Osyndai eriktiler toptaryn elimizdiń basqa óńirlerinde de qurý josparlanyp otyr.
«Bolashaqtyń qainary» qozǵalysy tek ekologiialyq aktsiialarǵa qatysýmen shektelmeidi. Belsendi jastar sý únemdeýdi nasihattaý jáne qoǵamda ekologiialyq mádenietti qalyptastyrý baǵytyndaǵy júieli jumystarǵa atsalysady.
«Búgingi is-sharaǵa eriktiler men stýdentterdiń qatysyp otyrǵany erekshe qýantady. Memleket basshysy eriktiler qozǵalysyna árdaiym erekshe kóńil bólip, olardyń qoǵamdaǵy rólin joǵary baǵalap keledi. Bizdiń ministrliktiń bastamasymen elimizde alǵash ret «Bolashaqtyń qainary» ataýymen sý salasynyń eriktiler toby quryldy. Bul jumystyń Jambyl oblysynan bastalýy Taraz qalasynda Qazaq ulttyq sý sharýashylyǵy jáne irrigatsiia ýniversitetiniń qaita ashylýymen tikelei bailanysy. Aldaǵy ýaqytta bul bastama Qazaqstannyń barlyq óńirin qamtidy», – dedi Sý resýrstary jáne irrigatsiia ministri Nurjan Nurjigitov.
Eske sala keteiik, byltyr qyrkúiek aiynda «Móldir bulaq» ekologiialyq aktsiiasy aiasynda Sý resýrstary jáne irrigatsiia ministrligi men vedomstvoǵa qaraityn uiymdardyń mamandary elimiz boiynsha bulaqtar men jaǵalaý aýmaqtaryn tazalaý jumystaryn júrgizgen bolatyn. Is-sharaǵa 4 myńnan astam adam qatysyp, 300 tonnadan astam qoqys jinaldy.
Qazirgi ýaqytta «Qazgidrogeologiia» ulttyq gidrogeologiialyq qyzmeti Qazaqstan aýmaǵyndaǵy barlyq bulaqty túgendeý jumystaryn júrgizýdi bastady. Aldyn ala derekterge sáikes, búgingi tańda 711 áleýetti bulaq anyqtaldy. Qor jáne muraǵat materialdary negizinde 2772 bulaqty qamtityn karta jasaqtaldy. Bulaqtar sý resýrstary tapshylyǵy jaǵdaiynda sýmen qamtamasyz etýdiń qosymsha kózi retinde qarastyrylady.
